एजेन्सी – इटालियन सिरी ‘ए’ मा युभेन्ट्सले पहिलो जित दर्ता गरेको छ । घरेलु टोली स्पेजियालाई ३–२ ले पराजित गर्दै युभेन्ट्सले पहिलो जित आत्मसात गरेको हो ।

यो सिजनको सिरी ‘ए’ मा युभेन्ट्सको पहिलो जितमा मोइस किन, फेडरिको चिइसा र म्याथ्थिज डि लेग्टले गोल गरे । घरेलु टोलीका इमानुयल क्वार्टसिन ग्यासी र जानिस एन्टिस्टेले गोल फर्काए । क्लब इतिहासकै सबैभन्दा खराव सुरुवात गरेको युभेन्ट्सले उडिनेस र एसी मिलानसँग बराबरी खेल्दा इम्पोली र नेपोलीसँग हार बेहोरेको थियो ।

स्पेजियाको मैदानमा बुधबार राति भएको खेलको २८औं मिनेटमा मोइस किनको गोलबाट युभेन्ट्सले सुरुवाती अग्रता लिएको थियो । उनले एड्रिएन राविओटको पासमा गोल गरेका थिए । ३३औं मिनेटमा इमानुयल क्वार्टसिन ग्यासीले गोल गर्दै घरेलु टोलीलाई १–१ गोलको बराबरीमा ल्याए ।

४९औं मिनेटमा जानिस एन्टिस्टेले गोल गर्दै घरेलु टोलीलाई खेलमा २–१ को अग्रता दिलाए । ६६औं मिनेटमा फेडरिको चिइसाले गोल गर्दै युभेन्ट्सलाई बराबरीमा ल्याउँदै खेलमा फर्कने संकेत दिए । ७२औं मिनेटमा म्याथ्थिज डि लेग्टले गोल गर्दै गोल गर्दै युभेन्ट्सलाई ३–२ को प्रतिस्पर्धात्मक जित दिलाए ।

पहिलो जितसँगै युभेन्ट्सको ५ खेलबाट ५ अंक जोडेर १३औं स्थानमा उक्लिएको छ । पराजित स्पेजिया ४ अंकसहित १७औं स्थानमा रहेको छ ।

अन्य नतिजा
सालेरनीटानाविरुद्ध अ‍ेलास भेरोना (२–२)
क्याग्लिएरीविरुद्ध इम्पोली (०–२)
एसी मिलानविरुद्ध भेनेजिया (२–०)