एजेन्सी – अल्जेरियन रियाद महारेजले दुई गोल र एक असिस्ट तथा फिल फोडेनले एक गोल र दुई असिस्ट दिएपछि साविकको विजेता म्यानचेस्टर सिटीले इंग्लिस फुटबल लिग (इएफएल) कपको तेस्रो राउन्डको खेलमा लिग वान क्लब वेकम्व वान्डेरर्समाथि सानदार पूनरागमन जित निकालेको छ ।

सिटीले घरेलु मैदानमा एक गोलले पछि परेको उल्ट्याउँदै वेकम्वमाथि ६–१ को फराकिलो जित निकालेको हो । सिटीको फराकिलो जितमा रियाद महारेजले दुई तथा केभिन डि ब्रुएन, फिल फोडेन, फेरान टोरेस र कोल पाल्मेरले समान एक गोल गरे । वेकम्वका ब्रान्डन हानलानको गोल सान्त्वना बन्यो ।

इतिहाद स्टेडियममा गोलको वर्षा भएको खेलमा पाहुना टोली वेकम्वले २४औं मिनेटमा ब्रान्डन हानलानको गोलबाट अप्रत्यासित अग्रता लिएको थियो । उनले रायन टाफाजोलीको पासमा गोल गरेका थिए । तर त्यो अग्रता लामो समय टिकेन । २९औं मिनेटमा केभिन डि ब्रुएनले फिल फोडेनको पासमा गोल गर्दै सिटीलाई खेलमा फर्काए ।

४३औं मिनेटमा रियाद महारेजले जोस विल्सन इसब्रान्डको पासमा तथा पहिलो हाफको इन्ज्युरी समयको थप गरिएको पहिलो मिनेटमा फिल फोडेनले रियाद महारेजको पासमा गोल गर्दै सिटीलाई ३–१ को अग्रता दिलाए ।

सिटी यतिमै रोकिएन । ७१औं मिनेटमा फेरान टोरेसले फिल फोडेनको पासमा गोल गर्दै सिटीलाई खेलमा ४–१ ले अघि बढाए । ८३औं मिनेटमा रियाद महारेजले रहिम स्टर्लिङको पासमा व्यक्तिगत दोस्रो तथा टोलीका लागि पाँचौ गोल गरेपछि सिटी फराकिलो जिततर्फ अग्रसर बन्यो ।

८८औं मिनेटमा सब्सिच्युट फरवार्ड कोल पाल्मेरले लुक मेवेट तावुको पासमा गोल गर्दै सिटीलाई ६–१ को फराकिलो जित दिलाए । पाल्मेर ७२औं मिनेटमा फेरान टोरेसको स्थानमा मैदान छिरेका थिए ।