एजेन्सी – क्रिस्टियानो रोनाल्डोको पूनरागमन पछि इडिन्सन काभानीका लागि म्यानचेस्टर युनाइटेडमा कठीन समय चलिरहेको छ ।

उरुग्वेली फरवार्ड गत सिजनका लागि प्रशिक्षक ओले गुनार सोल्साएरका लागि महत्वपूर्ण खेलाडीका रुपमा रहेका थिए । नयाँ सिजनको सुरुवातामा रोनाल्डो युनाइटेडमा आबद्ध भएपछि भने उनी खुसी नरहेको टोली पूर्व खेलाडी डिमिटार बार्बाटोभले बताएका छन् ।

‘काभानी खुसी छैनन् । युनाइटेडमा उनको पहिलो सिजन उत्कृष्ट रह्यो, बार्बाटोभले भने,‘ तर अहिले उनी त्यो ठाँउसँगै जर्सी नं ७ पनि गुमाएका छन् । पूनरागमनपछि रोनाल्डोले जर्सी नं ७ पाएका छन् भने काभानी २१ नम्बर जर्सीमा खेल्दैछन् ।

सोल्साएरले काभानीसँग इमान्दार छलफल गरेको बार्बाटोभले आशा पनि गरेका छन् । हरेक खेलाडी खेल्न चाहन्छन् भन्ने राम्ररी बुझेका बार्बाटोभले तर त्यसको अन्तिम निर्णय भने प्रशिक्षकले नै लिने बताएका छन् । रोनाल्डोले ३ खेलमा ४ गोल गरिसकेका छन् ।

‘टोलीको अन्तिम छनोट प्रशिक्षकले गर्ने हो । तर यदि तपाई छनोटमा पर्नुभएन भने दुःख त लाग्छ नै,’ उनले भनेका छन् । रोनाल्डो प्रति उनको धारणा भने सकारात्मक देखिएन । समर्थकलाई खुसी पार्नका लागि रोनाल्डोको पूनरागमन राम्रो देखिए पनि उनको आगमनले समाधान भन्दा बढी समस्या हुने उनको बझाई छ ।

५ खेलमा युनाइटेड १३ अंकसहित तेस्रो स्थानमा छ । समान अंक जोडेका लिभरपुल र चेल्सी पनि १३ अंकसहित शीर्षस्थानमा छन् ।