एजेन्सी – इंग्लिस प्रिमियर लिगमा आज (आइतबार) राति विभिन्न तीन खेलमा प्रतिस्पर्धा हुदैछ । टोटेनहमले घरेलु मैदानमा लन्डन क्लब चेल्सीको आतिथ्यता गर्दैछ । खेल टोटेनहम हटस्पर स्टेडियममा नेपाली समयअनुसार राति ९:१५ बजे हुनेछ ।

घरेलु मैदानमा हुने खेलमा टोटेनहम चेल्सीलाई हराउँदै अंक तालिका सुधार गर्ने लक्ष्यमा हुनेछ । टोलीसँग ह्यारी केन, इमर्सन, डेल अली, ओलिभर स्किप, पिएरे इमिल होब्जजर्ग, सर्जियो रिगुइलोन, जोइ रोन्डोन, डाभिन्सन सान्चेज, माट दोहर्थी, ब्रायन गिल, जियोभानी लो सेल्सो, ह्यारी विङ्स, टांगी एनडोम्वेले र बेन डेभिस टोलीमा रहेका छन् । चोटका कारण ह्युङ मिन सन, लुकास मोउरा, स्टेभन वर्गवाइन र एरिक डाएरले खेल्ने सम्भावना न्युन छ । टोटेनहम ९ अंक जोडेर सातौ स्थानमा रहेको छ ।

यता, अपराजित रहेको चेल्सी घरेलु टोली टोटेनहमलाई स्तब्ध पार्दै शीर्षस्थानको लिभरपुलसँगको अंक बराबरी गर्ने लक्ष्यमा मैदान उत्रनेछ । टोटेनहमलाई हराउन सके चेल्सीले लिभरपुलसँग बराबरी अंक (१३) पुर्याउनेछ ।

टोलीसँग रोमेलु लुकाकु, मासन माउन्ट, काई हाभर्टज, मार्काेस अलन्सो, जर्गिन्हो, एङ्गोलो कान्टे, रिस जेम्स, एन्टेनियो रुडिगर, एन्ड्रिएस क्रिस्टेन्सेन, सिसर एज्पिलिक्वेटा र गोलरक्षक इडुआर्ड मेन्डी रहेका छन् । यस्तै हाकिम जियाच, बेन चिलवेल, थियागो सिल्भा, रुवेन लफटस चिक, टिमो वेर्नर, सउल निग्वेज र माटियो कोभासिस पनि टोलीमा रहेका छन् ।

यि दुई टोलीको पछिल्लो २९ खेलको नतिजामा चेल्सी १४ खेलमा विजयी भएको छ । ५ खेल टोटेनहमले आफ्नो पक्षमा पार्दा १० खेल बराबरीमा सकिएको छ । गत अगस्टमा भएको मैत्रीपुर्ण खेल २–२ गोलको बराबरीमा सकिएको थियो । त्यसअघि गत सिजनको लिगमा चेल्सीले १–० को जित निकालेको थियो ।

अन्य खेल

ब्राइटनविरुद्ध लेस्टर सिटी (राति ६:४५ बजे)

वेस्ट ह्यामविरुद्ध म्यानचेस्टर युनाइटेड (राति ६:४५ बजे)