एजेन्सी – लन्डन क्लब आर्सनलले इंग्लिस प्रिमियर लिगमा लगातार दोस्रो जित दर्ता गर्दा साविकको विजेता म्यानचेस्टर सिटी बराबरीमा रोकिएको छ ।

यसै सिजन रियल म्याड्रिडबाट स्थायी रुपमा अनुबन्ध भएका नर्वेजियन मार्टिन ओडेगार्डको गोल मद्दतमा आर्सनलले घरेलु टोली बर्नलेमाथि १–० को साँघुरो जित दर्ता गरेको हो । सुरुवाती तीन खेल गुमाएपछि आर्सनलको यो लगातार दोस्रो जित हो । आर्सनलले यसअघि नर्विच सिटीलाई १–० ले पराजित गरेको थियो । त्यसअघि आर्सनलले ब्रेन्टफर्ड, चेल्सी र म्यानचेस्टर सिटीसँग हार बेहोरेको थियो ।

टर्फ मुरमा शनिबार राति भएको प्रतिस्पर्धात्मक खेलको पहिलो हाफमा मार्टिन ओडेगार्डले गरेको गोल नै आर्सनलको जितमा निर्णायक बन्यो । उनले ३०औं मिनेटमा फ्रिकिकमा सिधै गोल गरेका थिए । दुवै टोलीले खेलमा केही अवसर पाएपनि सदुपयोग गर्न सकेनन् ।

लगातार दोस्रो जितसँगै आर्सनल ५ खेलबाट ६ अंक जोडेर १२औं स्थानमा उक्लिएको छ । पराजित बर्नले १ अंक जोडेर १९औं स्थानमा रहेको छ ।

यस्तै प्रिमियर लिगकै अर्काे खेलमा साविकको विजेता म्यानचेस्टर सिटी घरेलु मैदानमा साउथह्याम्टनसँग गोलरहित बराबरीमा रोकिएको छ । बल पोसेसन राखेपनि घरेलु टोली सिटीले साउथह्याम्टनको बलियो रक्षापङ्ति तोड्न नसक्दा बराबरीमा रोकिन बाध्य बन्यो ।

बराबीपछि सिटी ५ खेलबाट १० अंक जोडेर दोस्रो स्थानमा उक्लिएको छ । समान १० अंक नै रहेपनि म्यानचेस्टर युनाइटेड, चेल्सी र एभर्टन गोलअन्तरमा पछि छ । यि तीनै टोलीले एक खेल कम खेलेका छन् । साउथ ह्याम्टन ५ खेलबाट ४ अंक जोडेर १५औं स्थानमा छ ।

अन्य नतिजा

वल्भ्सविरुद्ध ब्रेन्टफर्ड (०–२)

बर्नलेविरुद्ध आर्सनल (०–१)

लिभरपुलविरुद्ध क्रिस्टल प्यालेस (३–०)

म्यानचेस्टर सिटीविरुद्ध साउथह्याम्टन (०–०)

नर्विचविरुद्ध वाट्फोर्ड (१–३)

यो पनि : लिभरपुलको सहज जित