एजेन्सी – क्याटलान क्लब बार्सिलोनाका अमेरिकी डिफेन्डर सर्जिनो डेस्टले च्याम्पियन्स लिग अन्तरगत बायर्न म्युनिखविरुद्धको समूह चरणको पहिलो खेल गुमाउने भएका छन् ।

बार्सिलोना र बायर्नबीचको खेल आज (मंगलबार) राति १२ः४५ बजे हुदैछ । सर्जिनोले अन्तर्राष्ट्रिय ब्रेकमा ५ सेप्टेम्वरमा भएको क्यानडाविरुद्धको खेलमा चोट बोकेका थिए । चोट बोकेलगत्तै उनी क्याटलान क्लब बार्सिलोना फर्किएका थिए । त्यसयता उनी निरन्तर रिह्यावमा रहेका छन् ।

बार्सिलोनाले आफ्ना डिफेन्डर सर्जिनो च्याम्पियन्स लिगमा फर्कने विश्वास गरेपनि उनी पुर्ण रुपमा फिट हुन सकेनन् । अब सर्जिनोको विकल्पमा प्रशिक्षक रोनाल्ड कोम्यानले सजी रोबर्टाेलाई खेलाउने सम्भावना छ । युवा डिफेन्डर ओस्कार मिनगुएजा पनि विकल्पमा रहेको छ ।

सर्जिनो डेस्टको चोटले बार्सिलोनालाई थप समस्या पर्ने देखिएको छ । यसअघि अन्सु फाती, सर्जियो अगुएरो, औसमाने डेम्वेले र मार्थिन ब्रेथवेट पनि चोटका कारण टोलीबाट बाहिरिएका छन् । यसले बार्सिलोनाको अग्रपङ्ति र डिफेन्समा थप समस्या हुने देखिएको छ ।

सर्जी रोबर्टाे र जेरार्ड पिकेले सामान्य चोट बोकेका छन् । तर, उनीहरु बायर्नविरुद्धको खेलमा उपलब्ध हुने प्रशिक्षक कोम्यानले बताएका छन् ।

चोट बोक्ने खेलाडीको सुची लामो रहँदा बार्सिलोना बायर्नविरुद्ध सचेत भएर खेल्नेछ । टोलीले १५ अगस्ट २०२० मा भएको क्वाटरफाइनलमा ८–२ को लज्जास्पद हार बेहोरेको थिए ।