एजेन्सी – प्रतिस्पर्धा हरेक क्षेत्रमा छ । झन् फुटबलमा हुने नै भयो । सन् २०२१ को वर्ष सकिन अझै सय दिन भन्दा बढी बाँकी छ । विश्व फुटबलमा यो वर्ष सर्वाधिक गोलकर्ता को बन्ला भने रोचक प्रतिस्पर्धा पनि जारी छ ।

यहाँ ५ खेलाडीको चर्चा गरिएको छ जसले यो वर्षमा देश र क्लबका लागि सर्वाधिक गोल गर्ने आँकलन गरिएको छ । यिनै ५ खेलाडीमध्ये यो वर्षको सर्वाधिक गोलकर्ता बन्ने सम्भावना छ । यो वर्ष गोल गर्ने खेलाडीको सुचीको शीर्षस्थानमा बायर्न म्युनिख तथा पोल्यान्डका फरवार्ड रोबर्ट  लेवान्डोस्की छन् । उनले यो वर्ष ४७ गोल गरिसकेका छन् । बुन्डेसलिगामा उनको उच्च फर्म जारी छ । विश्व फुटबलका उत्कृष्ट सेन्टर फरवार्डमध्येका लेवान्डोस्कीले बुन्डेसलिगाको यो सिजन ४ खेलमा ६ गोल गरिसकेका छन् ।

दोस्रो नम्बरमा नर्वेजियन सनसनी इर्लिङ हालान्ड छन् । जसले देश र बोरुसिया डर्टमन्डका लागि यो वर्ष ३८ गोल गरिसकेका छन् । २१ वर्षे प्रभावशाली फरवार्डले बुन्डेसलिगामा ४ खेलमा ५ गोल गरिसकेका छन् ।

तेस्रो स्थानमा लियोनल मेस्सी रहेका छन् । हालैमात्र उनी बार्सिलोनाबाट पेरिस सेन्ट जर्मेन (पिएसजी) पुगेका छन् । उनले अर्जेन्टिना र बार्सिलोनाका लागि यो वर्ष ३६ गोल गरेका छन् । पिएसजीमा भने एक मात्र खेल खेलेका मेस्सीले गोलको खाता खोल्न बाँकी छ ।

मेस्सीका पिएसजी सहकर्मी केलियन एमबाप्पेले यो वर्ष ३३ गोल गरेका छन् । यद्दपी युरोपियन च्याम्पियनसिपमा उनी गोल गर्न असफल रहे । लिग वानमा भने यो सिजन ४ खेलमा उनले ३ गोल गरिसकेका छन् ।

पाँचौं नम्बरमा म्यानचेष्टर युनाइटेड तथा पोर्चुगलका फरवार्ड क्रिस्टियानो रोनाल्डो छन् । उनले यो वर्ष ३२ गोल गरिसकेका छन् । हालै मात्र उनी अन्तर्राष्ट्रिय फुटबलमा सर्वाधिक गोल गर्ने खेलाडी बनेका छन् । उनले देशका लागि १ सय ११ गोल गरेका छन् । १२ वर्षपछि युनाइटेड फर्केर प्रिमियर लिगका शनिबारको खेलमा न्युक्यासललाई ४–१ ले हराउँदै उनले २ गोल गरेका थिए । मंगलबार योङ ब्वाइजसँग टोली पराजित भएपनि रोनाल्डोले युनाइटेडलाई अग्रता दिलाएका थिए ।

यो वर्ष पूरा हुन अझै साढे ३ महिना बढीको समय छ । यि ५ खेलाडीबाट अझै धेरै गोल हुन बाँकी छ ।