काठमाडौं (हाम्रो खेलकुद) – घरेलु फुटबलको लोकप्रिय र चर्चित ललितपुरको रुस्लान थ्री स्टारले आसन्न ‘ए’ डिभिजन लिग र राष्ट्रिय लिगलाई लक्षित गर्दै खेलाडी अनुबन्धलाई निरन्तरता दिदा युवा मिडफिल्डर लाकेन लिम्बुलाई क्लबमा भित्र्याएको छ ।

थ्री स्टारले सिंगापुरमा हुर्किएका १९ वर्षीय मिडफिल्डर लाकेनलाई लामो समयको लागि क्लबमा अनुबन्ध गरेको जनाएको छ । थ्री स्टारले लिएको ट्रायलमा राम्रो छाप छोडेपछि उनी पहिलोपटक शीर्ष डिभिजनको क्लबमा अनुबन्धित भएका हुन् ।

सिंगापुरमा जन्मिएका लाकेन १२ वर्षको उमेरमा सिंगापुरको एफ–१७ फुटबल एकेडेमीमा जोडिएका थिए । त्यहाँ उनले तीन वर्ष बिताएपछि उनी एनजेडए (एन्जा) सकर एकेडेमीमा आबद्ध भएका थिए । त्यहाँ उनले तीन वर्ष आफ्नो खेल कला निखारे ।

एकेडेमीमा रहँदा उनले स्वीडेन, मलेसिया र स्पेन लगायतका देशमा उमेर समूहको प्रतियोगितामा खेल्ने अवसर पाएका थिए । नेपालमा उनले धरानको फोकस–१६ क्लबबाट मोसफलका केही गोल्डकप खेलेका थिए ।

थ्री स्टारसँगको सम्झौतापछि लाकेनले ‘ए’ डिभिजन लिगका लागि आफु उत्साहित रहेको बताए । ‘जब मैले फुटबल खेल्न थाले । त्यसबेला देखि नै नेपाल आएर क्लब फुटबल खेल्ने योजना बुनेको थिए । कोभिड महामारी भन्दा अघि नै हामी नेपाल आएका थियौ ।’ लाकेनले भने, ‘महामारीको कारण केही मोफसलको प्रतियोगिताबाहेक खेल्ने अवसर पाएको छैन । प्रतिष्ठित क्लब थ्री स्टारबाट ‘ए’ लिग खेल्नका लागि उत्साहित छु र क्लबका लागि उत्कृष्ट खेल्नेछु ।’

थ्री स्टारले यसअघि कप्तान विक्रम लामा, उपकप्तान अनन्त तामाङ, सन्जोक राई, निशान खड्का, मनग्य नकर्मी, सुसान श्रेष्ठ, मिक्चेन तामाङ र निशान खड्काको सम्झौता नविकरण गर्दा नयाँ खेलाडीको रुपमा डोना थापा, आयुष घलान, राफयल रिमगागो र गोलरक्षक रोशन गुरुङलाई अनुबन्ध गरिसकेको छ । ‘ए’ डिभिजन लिग कात्तिक २९ बाट सुरु हुदैछ ।