सुबास हुमागाईं, काठमाडौं

नेपाली राष्ट्रिय महिला फुटबल टोलीले फिफाको मान्यता प्राप्त अन्तर्राष्ट्रिय मैत्रीपूर्ण खेलमा विहीबार बंगलादेशको सामना गर्दा दशरथ रंगशालामा पहिलो पटक खेल्दै हुनेछ । यसअघि उमेर समूहको राष्ट्रिय टोलीले रंगशालामा खेलिसकेपनि सिनियर टोलीले भने खेल्न पाएको थिएन ।

सन् २०१६ मा मलेसियाविरुद्ध मैत्रीपूर्ण खेलमार्फत महिला टोलीले घरेलु मैदानमा अन्तर्राष्ट्रिय डेब्यु गरेको थियो । साफ महिला च्याम्पियनसिप २०१६ को तयारीस्वरूप खेलिएको उक्त खेलमा नेपालले १-० को जित दर्ता गरेको थियो । त्यो खेल प्रशिक्षक कुमार थापाको पहिलो थियो । थापाले उक्त खेलमा ६ खेलाडीलाई डेब्यू दिएका थिए ।

थापाकै नेतृत्वमा नेपाली टोलीले भारतको सिलिगुडीमा भएको साफ च्याम्पियनसिपमा प्रदर्शन त सुधार्यो, तर नतिजा हेर्दा भने टोली असफल देखिन्छ । साफ च्याम्पियनसिपको इतिहासमा फाइनल पुग्न नसकेको एकमात्र प्रतियोगिता त्यहि नै बन्यो । भारत अर्को समूहबाट उपविजेता बन्दै आएपछि समूह विजेता नेपाल सेमिफाइनलमा पराजित भएको थियो ।

नेपालले सन् २०१९ मा पहिलो पटक महिला सिनियर टोलीको प्रतियोगिता आयोजना गर्ने क्रममा विराटनगरमा महिला साफ च्याम्पियनसिप आयोजना गर्यो । उपाधि यात्रामा पुन: एकपटक भारत तगारो बन्दा नेपाल उपविजेतामा सिमित भयो । त्यसपछि सन् २०१९ मा पोखरामा भएको १३ औं दक्षिण एसियाली खेलकुदमा पनि नेपालले भारतलाई हराउन सकेन ।

दशरथ रंगशालामा नेपालले पहिलोपटक खेल्दा टोलीमा ७ नयाँ खेलाडी डेब्युको प्रतीक्षामा हुनेछन् । विदेशी प्रशिक्षक ग्यारी फिलिप्सले आक्रमणमा नयाँ खेलाडी उतार्ने सम्भावना प्रबल छ । टोलीकी मुख्य फरवार्ड सावित्रा भण्डारी चोटका कारण बाहिर हुनु र अर्की फरवार्ड शर्मिला थापा टोलीमा नै नपर्नुले पनि युवा खेलाडीलाई अवसरको ढोका खुलेको छ ।

मुख्य फरवार्डको भूमिकामा प्रशिक्षक फिलिप्सले अनिता केसीलाई पनि प्रयोग गर्न सक्छन् । उनलाई साथ दिन सरु लिम्बु पनि उपलब्ध छिन् । यसबाहेक युवा फरवार्डत्रय रजनी थोकर, रश्मी घिसिङ र सविता राना डेब्युको प्रतिक्षामा रहनेछन् । तीनैजना महिला फुटबलमा नेपालको उर्वरस्थल रौतहटका हुन् । रश्मी भने गत वर्ष आर्मीमा अनुबन्धित भएकी थिइन् । मिडफिल्डर प्रिती राई पनि दोस्रो फरवार्डको रुपमा खेल्दै डेब्यु गर्ने सम्भावना रहेको छ ।

डिफेन्समा निशा थोकर, सिर्जना सिंह र विमला विक पहिलो पटक टोलीमा परेका छन् । यसबाहेक टोलीमा नियमित खेल्दै आएका गीता राना, हिरा भुजेल, पुनम जर्घा मगर, अमृता जैसी र पुजा राना आफ्नो स्थान बलियो पार्न तत्पर छन् । हिरा र गीताको स्थान पक्का जस्तै देखिन्छ ।

गोलरक्षकमा पनि टोलीमा तीव्र प्रतिस्पर्धा छ । लामो समयदेखि टोलीको पोस्ट सम्हालेकी एन्जिला तुम्बापो सुब्बालाई अन्जना राना मगर र उषा नाथले चुनौती दिइरहेका छन् । अन्जनाको घरेलु फुटबलमा उच्च प्रदर्शन रहेकोले पनि उनले स्थान बनाउन सक्छिन् । प्रशिक्षक फिलिप्सले तीनै गोलरक्षकमध्य जो पनि खेल्न सक्ने बताएका छन् ।

मिडफिल्डमा नेपालले दिपा राई र रेनुका नगरकोटेको अनुभवको सदुपयोग गर्नेछ । यी दुवै भर्खर चोटबाट फर्केकाले प्रशिक्षक फिलिप्स केहि संयम रहन सक्छन् । इन्दिरा राई यी दुईलाई केहि विश्राम दिन विकल्पका रुपमा रहनेछिन् । यसबाहेक अनिता बस्नेत, विमला चौधरी र मन्जली तामाङमध्य दुई जनाले विंगमा खेल्नेछन् ।

नेपालले आफ्नो टोलीको बलियो पक्ष अनुसार सुरुवाती एघार घोषणा गर्ने प्रशिक्षक फिलिप्सले बताएका छन् । प्रशिक्षणका दौरान र खेलअघि उनले दिएको अभिव्यक्ति सुन्दा नेपालले ४-५-१ को रणनीतिमा खेल्ने देखिन्छ । गोलरक्षकमा छनोटको तीव्र प्रतिस्पर्धा रहँदा डिफेन्समा राइट ब्याक पोजिसनमा प्रतिस्पर्धा रहेको छ ।

सरु लिम्बु यसपटक टोलीको मुख्य केन्द्रमा रहने देखिन्छ । आक्रमण र मिडफिल्ड दुवैमा खेल्न सक्ने उनलाई ‘फ्री रोल’ मा खेलाउने तयारी गरेका छन् । एपीएफबाट पनि यसै भूमिकामा तिखारिएकी सरुसामु राष्ट्रिय टोलीमा सावित्राको कमी महसुस हुन नदिन राम्रो अवसर छ । उमेर समूहमा कप्तानी गर्दै नेतृत्वदायी भूमिकामा आफूलाई अघि उभ्याएकी सरु अब राष्ट्रिय टोलीमा पनि अघि आउने अवसर छ ।

यसअघि विभागीय टोलीको वर्चस्व रहने टोलीमा यसपटक मोफसलका केहि खेलाडी पनि छन् । यी खेलाडीले अन्तर्राष्ट्रिय स्तरमा कस्तो प्रदर्शन गर्छ त्यो हेर्न बाँकी छ । मोफसलका टोलीमा सिमित अवसर पाउँदा पनि सिनियर टोली यात्रा तय गरेका यी खेलाडीले आउने दिनमा गर्ने प्रदर्शनले पनि उनीहरुको भविष्यको बाटो कोर्नेछ ।

बंगलादेशविरुद्ध खेल नेपालका लागि इतिहास हेर्ने हो भने अवसर भन्दा दबाब बढी हुने देखिन्छ । सावित्राको अनुपस्थितिले यसैपनि मानसिक रुपमा केहि दबाबमा रहेको टोलीसामु बंगलादेशविरुद्ध जित हासिल गर्नुपर्ने छ । सिनियर अन्तर्राष्ट्रिय फुटबलमा नेपालले अहिलेसम्म बंगलादेशसँग हार बेहोरेको छैन । हालसम्म खेलेका ६ खेलमा नेपालले ५ जित र १ बराबरी खेलेको छ । पछिल्ला खेलमा बंगलादेशले आफ्नो प्रदर्शन भने निकै सुधार गरेको छ ।

उमेर समूहमा बंगलादेश पछिल्लो समय नेपालमाथि हावी हुँदै आएकोले पनि बंगलादेशको महिला फुटबल सुधारिएको आँकलन गर्न कठिन छैन । अझ प्रशिक्षक गोलाम नै टोलीसँग निरन्तर काम गरिरहेका छन् । उनले उमेर समूहदेखि आफैं ल्याएका खेलाडीलाई अहिले सिनियर टोलीमा खेलाउँदै छन् । उनलाई आफ्नो टोलीबारे सम्पूर्ण जानकारी छ ।

नेपालका प्रशिक्षक ग्यारी फिलिप्स एक महिनायता टोलीसँग छन् । सिनियर टोलीले पहिलो पटक विदेशी प्रशिक्षक पाएको हो । उनीबिना टोलीले दुई साता प्रशिक्षण गरेको थियो । यसअघि टेक्निकल डाइरेक्टरका रुपमा टोलीमा रहेका उनीसँग सहायक प्रशिक्षकका रुपमा चेतन घिमिरे, अरुणा गुरुङ, भगवती थापा र श्रीप्रकाश वैद्य छन् । अरुणा राष्ट्रिय टोलीमा यसअघि पनि रहेकी थिइन् भने अन्य सबै पहिलो पटक राष्ट्रिय टोलीमा आएका हुन् । चेतन र भगवती भने क्लब टोलीमा रहेका थिए ।

यसअघि टोलीका प्रशिक्षक रहेर हाल महिला फुटबल विभागका प्रमुख हरि खड्काले टोलीलाई नजिकबाट साथ दिइरहेका छन् । तर नेपाली टोली उच्च लयमा हुँदा पनि खड्काको नेतृत्वमा टोली उपाधि विहिन बनेको थियो । खड्का आफैंले नतिजा दिन नसकेको भन्दै पद छोडेका थिए । उनले छाडेपछि अहिले टोलीमा निकै परिवर्तन भएको छ ।

युवा खेलाडीको बाहुल्यता रहेको टोलीले यसपटक घरेलु मैदान, अझ त्यसमाथि दशरथ रंगशालामा खेल्दैछ । एसियन कप छनोटको तयारीस्वरूप रहेको यस मैत्रीपूर्ण सिरिज खेलाडीका लागि अनुभव बटुल्ने र प्रशिक्षकका लागि खेलाडी चिन्ने अवसर हो । इतिहास रच्न लागेको यस टोलीले बंगलादेशविरुद्ध खेल एसियन छनोटको तयारी त छँदै छ, घरेलु समर्थकमाझ महिला फुटबलको अर्को युग कस्तो छ भन्ने देखाउने अवसर पनि छ ।