काठमाडौं (हाम्रो खेलकुद) – बंगलादेशविरुद्ध मैत्रीपूर्ण खेलअघि नेपाली महिला राष्ट्रिय फुटबल टोलीका मुख्य प्रशिक्षक ग्यारी फिलिप्सले आफ्नो टोली तयार रहेको बताए ।

खेलअघि प्रि म्याच कन्फ्रेन्समा बोल्दै नेपाली टिमका प्रशिक्षक ग्यारी फिलिप्सले यो खेल आफ्ना खेलाडीहरुका लागि धेरै कुरा सिक्ने अवसरको रुपमा रहेको बताएका छन् । ‘यो मैत्रीपुर्ण खेल हाम्रो एएफसी छनोटका लागि ठुलो मौका हो, केही खेलाडीहरु चोटग्रस्त छन् तर अहिले हामी राम्रो गरिरहेका छौं,’ ग्यारीले भने, ‘आफुसँग सावित्रा नभएपनि टिममा मजबुत २३ सदस्यीय टोली रहेको र सबैले राम्रो प्रदर्शन गर्नेमा विश्वस्त छु ।’

प्रशिक्षक फिलिप्सले टोलीमा आन्तरिक प्रतिस्पर्धा धेरै रहेकोले यसले टोलीलाई फाइदा पुग्ने बताए । ‘लगभग सबै पोजिसनमा प्रतिस्पर्धा छ । गोलरक्षकमा पनि तीनै खेलाडी सुरुवाती रोजाइमा पर्न संघर्षरत छन् । डिफेन्सको कुनै पोजिसनमा अनुभवको कमी छ,’ उनले भने, ‘दुवै खेलमा खेल्न २३ खेलाडी तयार छन् ।’

प्रशिक्षक फिलिप्सले सरु लिम्बुको उपस्थितिले टोलीलाई सहज हुने पनि बताए । ‘सरु विशेष खेलाडी हुन् । उनी सधैं बलको वरपर रहने खेलाडी हुन् । हामीले उनलाई कुनै रणनीतिमा बाँध्ने भन्दापनि स्वतन्त्र रुपमा खेल्न दिनेछौं,’ उनले भने, ‘ आक्रमणमा उनको प्रभाव रहन्छ । यसो भन्दा डिफेन्समा पनि उनीबाट आशा गरिरहेका छौं ।’

उज्वेकिस्तानमा आयोजना हुने एएफसी कप २०२२ छनोट अघि नेपाल र बंगलादेशले दुई मैत्रीपुर्ण खेल खेल्न लागेको हो । नेपाली महिला टोलीले त्रिपुरेश्वरस्थित दशरथ रंगशालमा बंगलादेशसँग दुई मैत्रीपुर्ण खेल खेल्दैछ । पहिलो मैत्रीपुर्ण खेल बिहीबार दोस्रो मैत्रीपुर्ण खेल आइतबार हुनेछ । दुवै खेल साँझ ५ बजे हुने अखिल नेपाल फुटबल संघ (एन्फा) ले जनाएको छ ।

नेपाली महिला टोलीले सन् २०२२ मा भारतमा हुने एसियन कपको छनोटका लागि उज्वेकिस्तानमा दुई खेल खेल्नेछ । उज्वेकिस्तानमा हुने छनोटमा नेपालले १८ सेप्टेम्वरमा फिलिपिन्स र २१ सेप्टेम्बरमा हङकङको सामना गर्नेछ ।