एजेन्सी – फिफा विश्वकप कतार २०२२ को युरोपेली छनोटमा स्पेन र बेल्जियममा सानदार जित दर्ता गरेका छन् । स्पेनले घरेलु मैदानमा आइतबार राति भएको खेलमा जर्जियामाथि ४–० को फराकिलो जित निकालेको हो ।

स्पेनको जितमा जोश गाया, कार्लाेस सोलेर, फेरान टोरेस र पाब्लो सारावियाले समान एक गोल गरे । पहिलो हाफमा ३ तथा दोस्रो हाफमा एक गोल भएको थियो । गोलको वर्षा भएको खेलमा स्पेनको खेलको १४औं मिनेटमा जोश गायाको गोलबाट गोलको खाता खोलेको थियो ।

२५औं मिनेटमा कार्लाेस सोलेरले मार्काेस लोरेन्टेको पासमा गोल गर्दै स्पेनको अग्रता दोब्बर पारे । उनले स्पेनको लागि दोस्रो खेलमा दोस्रो गोल गरेका हुन् । ३३औं मिनेटमा जोश गायाले गोल गरेपनि भिएआरमा उनी अफसाइड ठहरिदा गोलले मान्यता पाएन । ४१औं मिनेटमा फेरान टोरेसले लोरेन्टेकै पासमा गोल गरेपछि स्पेनले पहिलो हाफमा ३–० को अग्रता लिएको थियो ।

६३औं मिनेटमा पाब्लो सारावियाले पाब्लो फोनाल्सको पासा गोल गर्दै स्पेनलाई ४–० को फराकिलो जित दिलाए । इन्ज्युरी समयमा पाब्लो सारावियाले गोल गरेपनि पनि भिएआरमा अफसाइड ठहरिए ।

यो जितपछि समूह ‘बी’ मा स्पेन ५ खेलबाट १० अंक जोडेर शीर्षस्थानमा उक्लिएको छ । ३ खेल खेलेको स्वीडेन ९ अंक जोडेर दोस्रो स्थानमा रहेको छ । पराजित जर्जिया १ अंकसहित पुछारमा छ । यही समूहको अर्काे खेलमा कोसोभो र ग्रीसले १–१ गोलको बराबरी खेल्दै अंक बाँडेका छन् ।

यस्तै समूह ‘ई’ को खेलमा बेल्जियमले चेक रिपब्लिकलाई ३–० ले पराजित गरेको छ । बेल्जियमको जितमा रोमेलु लुकाकु, इडेन हाजार्ड र एलेक्सिस सइलीमेकर्सले समान एक गोल गरे ।

जितपछि बेल्जियम ५ खेलबाट १३ अंक जोडेर शीर्षस्थानमा रहेको छ । पराजित चेक ७ अंक जोडेर दोस्रो स्थानमा रहेको छ ।