काठमाडौं (हाम्रो खेलकुद) – ललितपुरको रुस्लान थ्री स्टार क्लबले युवा फरवार्ड सुसान श्रेष्ठसँग सम्झौता नविकरण गरेको छ। थ्री स्टारले शनिबार २२ वर्षीय युवा फरवार्डसँग दुई वर्षको लागि सम्झौता नविकरण गरेको हो ।

सुसान पहिलो संस्करणको ललित मेमोरियल यु–१८ फुटबल प्रतियोगिता सन् २०१६ देखि थ्री स्टारमा रहेका छन् । उनी थ्री स्टार क्लबको यु–१८ टोलीको पहिलो ब्याचका खेलाडी हुन् । उमेर समूहको प्रतियोगितामा उच्च प्रदर्शनसहित गोल पनि गरेपछि त्यतिबेलाका थ्री स्टारमा मुख्य प्रशिक्षक मेघराज केसीले उनललाई सिनियर टोलीमा बोलाएका थिए ।

थ्री स्टारले सन् २०१७ मा एएफसी कप खेल्दा उनी पनि टोलीसँगै मंगोलिया गएका थिए । थ्री स्टारले दोस्रो चरण पार गरेपनि अखिल नेपाल फुटबल संघ (एन्फा) को कमजोरीका कारण थ्री स्टारले दोस्रो चरण खेल्नबाट वञ्चित बनेको थियो । सोही घट्नापछि झन्डै १४ महिना फुटबलबाट टाढा रहेको थ्री स्टार पुनः फुटबलमा फर्कदा सुसानसहितका खेलाडीलाई क्लबमै राख्न सफल भएको थियो ।

सुसानले २०७६ को लिग थ्री स्टारबाटै खेलेका थिए । त्यसअघिको लिगमा पनि उनी थ्री स्टारमै रहेका थिए । उनले थ्री स्टारबाट भारतरत्न लोकप्रिय गोपीनाथ बोर्डाेलोई ट्रफीसँगै मोफसलका विभिन्न उपाधिहरु जितेका छन् ।

थ्री स्टारले यसअघि कप्तान विक्रम लामा, उपकप्तान अनन्त तामाङ, सन्जोक राई, निशान खड्का र मनग्य नकर्मीको सम्झौता नविकरण गर्दा नयाँ खेलाडीको रुपमा डोना थापा, आयुष घलान, राफयल रिमगागो र गोलरक्षक रोशन गुरुङलाई अनुबन्ध गरिसकेको छ ।

आसन्न ‘ए’ डिभिजन लिग कात्तिक २९ बाट हुने तय छ । राष्ट्रिय लिगको मिति घोषणा गरिएको छैन ।