एजेन्सी – क्याटलान क्लब बर्सिलोनाका मिडफिल्डर मिरालेम प्यानिच टर्किस क्लब बेसिक्टासमा अनुबन्धित भएका छन् । बोस्निया एन्ड हर्जगोभिनाका ३१ वर्षीय मिडफिल्डर एक सिजनका लागि लोनमा टर्किस क्लब बेसिक्टास पुगेका हुन् ।

गत सिजन नै इटालियन क्लब युभेन्ट्सबाट बार्सिलोना आएका प्यानिचले पहिलो सिजन राम्रो छाप छोड्न नसकेपछि उनलाई बार्सिलोनाले बेच्ने मनसाय बनाएको थियो । स्पेन लगायत ठुला देशमा यो समरको ट्रान्सफर सकिएपनि टर्कीलगायत अन्य केहि देशमा अझै समर ट्रान्सफर खुल्ला रहेका कारण उनको अनुबन्धन सफल भएको हो ।

गत सिजन युभेन्टसबाट बार्सिलोनामा अनुबन्ध भएका उनीबाट बार्सिलोनाले धेरै अपेक्षा राखेको थियो तर उनी प्रशिक्षक रोनाल्ड कोम्यानको मन जित्न सकेनन् । कोम्यानले मिडफिल्डमा सर्जियो बुस्क्वेट्स, फ्रान्की डि जोङ र पेड्रीलाई रुचाउँदा उनी क्याम्प नोउमा अपेक्षा पुरा गर्न सफल भएनन् ।

प्यानिच यो सिजनको लागि प्रशिक्षक कोम्यानको योजनामा थिएनन् । प्यानिचले गत सिजन बार्सिलोनाका लागि ३० खेल खेल्दा १३ पटक पहिलो रोजाईमा खेल्दा ५ पटक पुरा ९० मिनेट खेले । उनी यो सिजनको ला लिगाको सुरुवाती दुई खेलमा टोली नरहँदा तेस्रो खेलमा टोलीमा रहेपनि उनले खेल्ने अवसर पाएनन् । प्यानिच युभेन्ट्ससँगै रोमा फर्कने चर्चा चलेपनि त्यो छलफलमै सीमित बन्यो ।