एजेन्सी – फरवार्ड टिमो वेर्नर र मिडफिल्डर लिरोए सानेको गोल मद्दतमा जर्मनीले फिफा विश्वकप कतार २०२२ को युरोपेली छनोटमा लिचेस्टाइनमाथि २–० को सहज जित दर्ता गरेको छ ।

क्यावुनपार्क सेन्ट गल्लेन स्वीट्जरल्यान्डमा बिहीबार राति भएको खेलमा जर्मनीले घरेलु टोलीलाई खेलको सुरुवातदेखि नै दवावमा राखेपनि गोलको लाग ४१औं मिनेट कुर्नुपरेको थियो । टिमो वेर्नरले जमल मुसिएलाको पासमा गोल गर्दै जर्मनीलाई पहिलो हाफमा १–० को अग्रता दिलाएका थिए । जर्मनीका लागि ४६औं खेलमा उनको यो १६औं अन्तर्राष्ट्रिय गोल हो ।

७७औं मिनेटमा लिरोए सानेले गोल गर्दै जर्मनीको जित पक्का गरे । उनले लियोन गोरेट्जकाको पासलाई सदुपयोग गरेका थिए । जर्मनीले खेलभर ३० सट प्रहार गर्दा लिचेस्टाइनको रक्षापङ्ति निकै व्यस्त बनेको थियो । काउन्टर अट्याकमा ध्यान दिएको लिचेस्टाइनले २ सट मात्रै प्रहार गरेको थियो ।

यस्तै अर्काे खेलमा रोमानियाले आइसल्यान्डलाई २–० ले पराजित गरेको छ । रोमानियाको जितमा डेनिस मान र निकोलस स्टानसियुले गोल गरे । अर्काे खेलमा नर्थ म्यासेडोनिया र अर्मेनियाले गोलरहित बराबरी खेल्दै अंक बाँडेका छन् ।

यो नतिजापछि समूह ‘जे’ मा अर्मेनिया ४ खेलबाट १० अंक जोडेर शीर्षस्थानमा रहँदा जर्मनी ९ अंक जोडेर दोस्रो स्थानमा रहेको छ । नर्थ म्यासेडोनिया ७ अंकसहित तेस्रो स्थानमा रहँदा रोमानिया ६ अंक जोडेर चौथो स्थानमा रहेको छ । आइसल्यान्डको ३ अंक रहँदा लिचेस्टाइन अंकविहीन हुदै पुछारमा छ ।