एजेन्सी – फरवार्ड रोमेलु लुकाकु चम्कदा फिफा विश्वकप कतार २०२२ को युरोपियन छनोटमा बेल्जियमले इस्टोनियामाथि सानदार जित दर्ता गरेको छ ।

बेल्जियमले एक गोलले पछि परेको अवस्थामा घरेलु टोलीमाथि ५–२ को फराकिलो जित दर्ता गरेको हो । बेल्जियमको पूनरागमन जितमा रोमेलु लुकाकुले दुई तथा हान्स भानाकेन, एक्सेल विस्टेल र थोमस फोकेटले समान एक गोल गरे । घरेलु टोलीका म्याटिएस काइट र इरिक स्वोर्गाले गोल फर्काए ।

ए लि कोक एरिना ताल्लिन इस्टोनियामा बिहीबर राति भएको खेलमा घरेलु टोलीले खेलको दोस्रो मिनेटमा म्याटिएस काइटको गोलबाट अग्रता लिएको थियो । २२औं मिनेटमा हान्स भानाकेनले इडेन हाजार्डको पासमा गोल गर्दै खेललाई १–१ गोलको बराबरीमा ल्याए ।

२९औं मिनेटमा रोमेलु लुकाकुले गोल गर्दै बेल्जियमलाई पहिलो हाफमा २–१ ले अघि बढाए । ५२औं मिनेटमा लुकाकुले हान्स भानाकेनको पासमा व्यक्तिगत दोस्रो तथा टोलीका लागि तेस्रो गोल गर्दै बेल्जियम खेलमा ३–१ को आरामदायी स्थितिमा पुग्यो ।

६५औं मिनेटमा एक्सेल विस्टेलले लियान्द्रो ट्रोससार्डको पासमा गोल गरेपछि बेल्जियमले खेलमा ४–१ को फराकिलो अग्रता बनायो । ७६औं मिनेटमा थोमस फोकेटले यान्निक कारास्कोको पासमा गोल गरेपछि बेल्जियमले खेलमा ५–१ को अग्रता लिदै जिततर्फ अघि बढ्यो । ८३औं मिनेटमा इरिका स्वोर्गाले गोल गर्दै खेललाई ५–२ को अवस्थामा ल्याए ।

त्यसपछि थप गोल निस्कन नसक्दा बेल्जियमले समूह ‘ई’ मा आफ्नो अपराजित यात्रालाई कायम राख्न सफल भयो । यो जितसँगै बेल्जियम ४ खेलबाट १० अंक जोडेर शीर्षस्थानमा यथावत रहेको छ । पराजित इस्टोनिया अंकविहीन हुदै पुछारमा छ ।

यही समूहको अर्काे खेलमा चेक रिपब्लिकले बेलारुसलाई १–० ले पराजित गरेको छ । पहिलो हाफमा एन्टोनिन बाराकले गरेको गोल नै चेकको जितमा निर्णायक बन्यो । जितपछि चेक ४ खेलबाट ७ अंक जोडेर दोस्रो स्थानमा यथावत रहेको छ । वेल्स र बेलारुसको समान ३ अंक छ ।