एजेन्सी – फिफा विश्वकप कतार २०२२ को छनोट खेलमा विश्व विजेता फ्रान्स बराबरीमा रोकिएको छ । १० खेलाडीमा समेटिएको फ्रान्स घरेलु मैदानमा बोस्निया एन्ड हर्ज गोभिनासँग १–१ गोलको बराबरीमा रोकिएको हो ।

स्टेट डि ला मिनाउ स्टार्सवर्गमा बुधबार राति भएको खेलमा बोस्नियाका इडेन जेकोले गोल गर्दा घरेलु टोलीका एन्टोइन ग्रिजमनले बराबरी गोल फर्काएका थिए ।

प्रतिस्पर्धात्मक खेलको ३६औं मिनेटम इडेन जेकोको गोलबाट बोस्नियाले अग्रता लिएको थियो । उनले इरमेडिन डिमिरोभिकको पासमा गोल गरेका थिए । त्यसको चार मिनेटपछि नै एन्टोइन ग्रिजमनले गोल गर्दै खेललाई १–१ गोलको बराबरीमा ल्याए ।

५१औं मिनेटमा फ्रान्स १० खेलाडीमा समेटिन पुग्यो । सिड कोलासिनाकमाथि फउल गरेपछि रेफ्रीले भिएआरको सहायता लिदै जुलेस कोउन्डेलाई रातो कार्ड देखाउँदै मैदान बाहिर पठाएका थिए ।

त्यसपछि फ्रान्सले बराबरीलाई जोगाउन सफल हुदा बोस्नियाले फ्रान्स १० खेलाडीमा समेटिएको फाइदा उठाउन सकेन । १० खेलाडीमा समेटिएपनि फ्रान्सले बल पोसेसन राख्दै बोस्नियालाई दवाव बढाएपनि फिनिसिङ गर्न नसक्दा खेल बराबरीमा टुंगियो ।

यो बराबरीपछि समूह ‘डी’ मा अपराजित रहेको फ्रान्स ४ खेलबाट ८ अंक जोडेर शीर्षस्थानम रहेको छ । बोस्निया २ अंक जोडेर चौथो स्थानमा रहेको छ । युक्रेन ४ अंकसहित दोस्रो स्थानमा रहँदा समान २ अंक नै रहँदा फिनल्यान्ड तेस्रो तथा काजकस्तान पाँचौ स्थानमा रहेको छ ।

यही समूहको अर्काे खेलमा काजकस्तान र युक्रेनले २–२ गोलको बराबरी खेल्दै अंक बाँडेका छन् ।