एजेन्सी – कोलम्वियन भेट्रान फरवार्ड राडामेल फल्काओ ८ वर्षपछि स्पेनिस क्लब फुटबलमा फर्किएका छन् । यो सिजनको समर ट्रान्सफरको अन्तिम दिन रायो भालेकानोले ३५ वर्षीय फल्काओलाई टर्किस क्लब गालाटासारेबाट २ वर्षको लागि अनुबन्ध गर्न सफल भएको हो ।

फल्काओ इटालियन क्लबले अफर गरेपनि स्पेनमा फर्कने निर्णय गरेका हुन् । यससँगै फल्काओ ८ वर्षपछि स्पेनिस क्लब फुटबलमा फर्किएको छ । फल्काओले यसअघि एट्लेटिको म्याड्रिडबाट दुई सिजन २०११ देखि २०१३ सम्म खेलेका थिए । उनले एट्लेटिकोमा दुई सिजनमा ९१ खेलमा ७० गोल गरेका थिए ।

कतार विश्वकप २०२२ खेल्ने योजनामा रहेको फल्काओ राष्ट्रिय टोलीमा पर्न नियमित फुटबल खेल्न चाहन्छन् । गालाटासारे र फल्काओबीच सम्झौता रद्द गर्ने सहमति भएपछि रायो भालेकानोले उनलाई भित्र्याउन सफल भएको हो । फल्काओ २०१९–२० को सिजनमा फ्रान्सेली क्लब मोनाकोबाट गालाटासारे पुगेका थिए । उनले गालाटासारेबाट दुई सिजनमा ४० खेलमा २० गोल गरेका छन् । यो सिजन उनले दुई खेल खेलिसकेका थिए ।

लान्सेरस र अर्जेन्टिनी क्लब रिभर प्लेटबाट युथ करियर निखारेका फल्काओले त्यसपछि उनले पोर्टाे एट्लेटिको म्याड्रिड र मोनाकोबाट व्यवसायिक खेल खेल्दा इंग्लिस क्लब म्यानचेस्टर युनाइटेड र चेल्सीबाट लोनमा खेलिसकेका छन् ।

सन् २००७ देखि कोलम्वियाको राष्ट्रिय टोलीम रहेका फल्काओले ९१ खेलमा ३५ अन्तर्राष्ट्रिय गोल गरेका छन् । उनी अहिले दक्षिण अमेरिकी विश्वकप छनोट खेलमा लागि टोलीमा रहेका छन् ।

फल्काआले रिभर प्लेटबाट अर्जेन्टिनी प्रिमेरा डिभिजन, पोर्टाेबाट प्रिमेरा लिगा, टाका डि पोर्चुगल र सुपर टाका दुईपटक जित्दा एक पटक युरोपा लिग जितेका छन् । एट्लेटिको म्याड्रिडबाट कोपा डेल रे, युरोपा लिग र युइएफए सुपर कप जितेका छन् । मोनाकोबाट फ्रेन्च लिग वान जितेका छन् ।