एजेन्सी – उरुग्वेली स्टार लुइस सुआरेजले कतार विश्वकप २०२२ अन्तरगतको दक्षिण अमेरिकी विश्वकप छनोटका तीन खेल गुमाउने भएका छन् ।

चोटका कारण वर्षीय सुआरेजले सेप्टेम्वरको लागि तय भएको तीन विश्वकप छनोटका खेलहरु गुमाउने पक्का भएको हो । आइतबार राति भिल्लारियलसँग २–२ गोलको बराबरीमा रोकिएको खेलमा सुआरेजले चोट बोक्न पुगेका थिए । सुआरेजले यो सिजन पहिलोपटक पहिलो रोजाईमा खेलेका थिए । तर, उनले चोट बोक्न पुगेका थिए ।

एट्लेटिकोले विज्ञप्ति जारी गर्दै एमआरआई स्क्यानमा सुआरेजको देब्रे घुडामा चोट देखिएको छ । उनी कम्तीमा दुई साता मैदान बाहिर रहनेछन् । उनी रिकभरीका लागि स्पेनमै रहने बताइएको छ । उनी १२ सेप्टेम्वरमा स्पान्योलसँगको खेलमा उपलब्ध हुन सक्ने अपेक्षा गरिएको छ ।

एट्लेटिकोले उरुग्वे फुटबल फेडेरेसनलाई पत्रचार गर्दै सुआरेज खेल्न नसक्ने जानकारी गराइसकेको छ । अर्काे फरवार्ड इडिन्सन काभानी पनि टोलीमा नरहँदा उरुग्वेलाई समस्या पर्न सक्नेछ । उरुग्वेले ३ सेप्टेम्वरमा पेरुसँग उसकै मैदानमा खेल्नेछ । त्यसपछि ६ सेप्टेम्वरमा बोलिभिया र १० सेप्टेम्वरमा इक्वेडरसँग घरेल मैदानमा खेल्ने तालिका छ ।

उरुग्वे ८ खेलबाट समान २ जित, बराबरी र हारको नतिजासाथ ८ अंक जोडेर चौथो स्थानमा रहेको छ । दक्षिण अमेरिकी छनोटमा उरुग्वेले चिली र कोलम्वियालाई पराजित गर्दा इक्वेडर र ब्राजिलसँग पराजित भएको थियो । पाराग्वे र भेनेजुएलासँग गोलरहित बराबरी खेलेको थियो ।

दक्षिण अमेरिकी छनोटबाट शीर्ष चार टोलीले विश्वकपमा स्थान बनाउनेछ । पाँचौ स्थानमा रहने टोलीले प्ले अफ खेल्नुपर्नेछ ।