एजेन्सी – अष्ट्रियन मिडफिल्डर मार्सल साबिट्जर जर्मन बुन्डेसलिगामा गत सिजन उपविजेता बनेको आरबी लाइप्जिग छाडेर च्याम्पियन क्लब बायर्न म्युनिखमा अनुबन्धित भएका छन् ।

बायर्नले साबिट्जरसँग ४ वर्षको लागि सम्झौता गरेका छन् । उनले बायर्नमा ८ नम्बर जर्सी प्रयोग गर्नेछन् । साबिट्जरले यसै सिजन लाइप्जिग छाडेर बायर्न आएका प्रशिक्षक जुलियन नागल्सम्यान र डिफेन्डर डायोट उपामेकानोसँग काम गर्नेछन् ।

नागल्सम्यानले गत सिजन साबिट्जरलाई आफ्नो टोलीको कप्तान बनाएका थिए । लाइप्जिगले गत सिजन जर्मन बुन्डेसलिगा र डीएफबी पोकाल दुवै प्रतियोगितामा उपविजेता बन्द उनको प्रदर्शन महत्त्वपूर्ण थियो । साबिट्जरले युरोमा पनि अष्ट्रियाका लागि प्रभावशाली प्रदर्शन गरेका थिए ।

साबिट्जरले अब बायर्नका लागि आफ्नो पूर्व क्लब लाइप्जिगविरुद्ध नै खेल्दै डेब्यु गर्ने सम्भावना रहेको छ । उनले मिडफिल्डमा लिओन गोरेट्जका, जोशुवा किम्मिख र कोरेन्टिन टोलिसोसँग सेन्टर मिडफिल्डमा स्थान बनाउन प्रतिस्पर्धा गर्नेछन् । उनी मिडफिल्डको दायाँ र बायाँ भागमा पनि खेल्न सक्ने क्षमता राख्दछन् ।

साबिट्जरले अनुबन्ध भएपछि बायर्नबाट खेल्ने आफ्नो सानैदेखिको सपना पूरा भएको बताएका छन् । ‘म बायर्नबाट खेल्न पाउँदा निकै खुसी छु । बाल्यकालमा मेरो लागि बायर्नको जर्सी सबथोक थियो । क्रिसमसमा जर्सी किन्दा एकदम खुसी हुन्थें,’ उनले भने, ‘ अब बायर्नका लागि धेरै भन्दा धेरै उपाधि जित्ने लक्ष्य हुनेछ ।’