एजेन्सी – युक्रेनी क्लब साख्तर डोनेक्स, अष्ट्रियन क्लब रेडबुल साल्जवर्ग र मोल्दोभाको एफसी सेरिफ युइएफए च्याम्पियन्स लिगमा छनोट हुन सफल भएको छ ।

दोस्रो लेग अतिरिक्त समयमा २–२ गोलको बराबरी टुंगिदामा साख्तरले फ्रान्सेली क्लब मोनाकोलाई समग्रमा ३–२ ले पराजित गर्दै च्याम्पियन्स लिगको समूह चरणमा स्थान पक्का गरेको हो ।

दोस्रो लेगमा विसान विन यडरले दुई अवे गोल गर्दै मोनाकोको सम्भावना जीवित राख्दै खेललाई अतिरिक्त समयमा लम्ब्याएपनि अतिरिक्त समयमा रुवेन एगुइलरले आत्मघाती गोल गरेपछि मोनाको च्याम्पियन्स लिगलाई छनोट हुन सकेन । दोस्रो लेगमा साख्तरका मार्लोसले एक गोल गरेका थिए । त्यसअघि विसाम विन यडरको दुई गोलमा मोनाकोले पहिलो हाफमै मोनाकोले २–० को अग्रता लिएको थियो ।

यस्तै प्ले अफको अर्काे खेलमा डेनिस क्लब ब्रोन्डवी आइएफलाई समग्रमा ४–२ को जित निकाल्दै साल्जवर्गले च्यामिपन्स लिगको समूह चरणमा स्थान बनाउन सफल भयो । साल्जवर्गले पहिलो र दोस्रो लेगमा समान २–१ कै जित निकाल्यो । दोस्रो लेगमा साल्जवर्गको जितमा बेन्जामिन सेस्को र ब्रेन्डेन आरोन्सनले गोल गरे । घरेलु टोली ब्रोन्डवीका एन्ड्रेस म्याक्सले एक गोल फर्काए ।

अर्काे खेलमा मोल्दोभाको एफसी सेरिफले क्रोएसिएन क्लब डिनामो जाग्रिवलाई समग्रमा ३–० ले पराजित गर्दै क्लब इतिहासमै पहिलोपटक च्याम्पियन्स लिगलाई छनोट हुन सफल भएको छ । दोस्रो लेग गोलरहित बराबरीमा सकिदा पहिलो लेगको ३–० को जित नै सेरिफलाई समूह चरण पुग्न पर्याप्त बन्यो ।

यो नतिजासँगै नयाँ सिजनको लागि सबै ३२ टोलीको टुंगो लागेको छ । बिहीबार तीन टोलीको टुंगो लागेको थियो । आज (बिहीबार) नै समूह विभाजन र खेल तालिका सार्वजनिक हुनेछ ।