एजेन्सी – फ्रान्सेली लिग वन अन्तर्गत आइतबार राती भएको निस र मार्सेबीचको खेल घरेलु टोली निसका समर्थक विपक्षी खेलाडी कुट्न मैदान प्रवेश गरेपछि खेल रद्द भएको छ ।

खेलको ७४ औं मिनेटमा निसका समर्थकले मार्सेका डिमीट्री पाएटलाई बोतलले हानेका थिए । बोतल लागेपछि मैदानमा ढलेका उनले उठेर उक्त बोतल समर्थकतर्फ नै फ्याँके । त्यसपछि निसका समर्थक उनीमाथि जाइलाग्न मैदान पस्न थाले । लगत्तै मार्सेका अन्य खेलाडी पनि पाएटकै पछि लागे ।

एकातर्फ निसका खेलाडी मार्सेका खेलाडीलाई रोक्ने प्रयासमा थिए । त केहि समर्थक मैदान पसेर विपक्षी खेलाडीमाथि हातपात नै गर्न । एक्कासी भएको घटनामा मैदानका स्टेवार्ड (सुरक्षा दिने टोली) ले पनि भिड थाम्न सकेनन् । समर्थकको आक्रमणले मार्सेका तीन खेलाडी घाइते हुन पुगेका बुझिएको छ ।

रेफ्री बेनोइत बास्तीएनले खेल केहि बेर रोक्दै दुवै टोलीलाई भित्र लगे । तर पुन: खेल सुचारु गर्ने वातावारण नदेखेपछि रेफ्रीले खेल रद्द गर्ने निर्णय गरे । लिग आयोजकले भने खेल अघि बढ्नु पर्ने अड्डी राखेको थियो । निसका खेलाडी मैदान प्रवेश गर्दा मार्सेका खेलाडी भने खेल्न उचित वातावरण नरहेको बताउँदै मैदान प्रवेश गरेनन् । खेलमा निसले १-० को अग्रता लिएको थियो । कास्पर डोलबर्गले ४९ औं मिनेटमा अग्रता दिलाएका थिए ।

लिग आयोजकको निर्देशन अनुसार रेफ्रीले खेल सुचारु गरेका थिए । मैदानमा मार्सेका खेलाडी नै उपस्थित नभएपछि लिगको नियमावली अनुसार खेल ३-० ले निसको पक्षमा जित दिइएको छ । तर मार्सेले यस विषयमा अपिल गर्ने निर्णय गरेको छ । रेफ्रीले नै खेल सुचारु गर्न राम्रो वातावरण नरहेको बताइरहँदा आयोजल लिग वनको दबाबमा खेल गरेको टोलीको दावी छ ।

समर्थकको आक्रमणबाट पाएटको ढाडमा चोट लागेको छ । यसै सिजन क्लबमा आएका मिडफिल्डर म्याटियो गुएन्डोजी र लुइस पेरेसको घांटीमा पनि निलडाम रहेको छ । यस्तै अन्य खेलाडीले पनि सामान्य चोट बोकेका छन् । खेलको नतिजा निसको पक्षमा गएपनि टोलीले ठूलो जरिवाना बेहोर्रने सम्भावना छ ।

Pitch invasion by fans during Nice-Marseille pic.twitter.com/s0drLdN97b

— 🚽。 (@gexmsvivi) August 22, 2021