एजेन्सी – लन्डन क्लबका लागि दोस्रोपटक डेब्यु गरेका बेल्जियन फरवार्ड रोमेलु लुकाकु र रिस जेम्सले गोल गरेपछि नर्थ लन्डन डर्वी भिडन्तमा चेल्सीले आर्सनललाई पराजित गरेको छ ।

चेल्सीले आर्सनललाई उसकै मैदानमा २–० को सहज जित हात पारेको हो । दुवै गोल पहिलो हाफमा भएको थियो । इमिरेट्स स्टेडियममा आइतबार भएको खेलको १५औं मिनेटमा लुकाकुको गोलबाट चेल्सीले अग्रता लिएको थियो ।

यसै समरमा ९८ मिलियन पाउन्डमा इटालियन च्याम्पियन इन्टर मिलानबाट चेल्सी आएका लुकाकुले माटियो कोभासिस हुदै रिस जेम्सबाट आएको पासलाई सिक्स यार्ड बक्सभित्रबाट सहजै फिनिस गरेका थिए । २१औं मिनेटमा लुकाकुले अर्काे अवसर खेर फाल्दा चेल्सी अग्रता दोब्बर पार्नबाट चुक्यो ।

२९औं मिनेटमा ग्रानिट झाकाको पासमा अल्वर्ट साम्वी लोकांगाको प्रहार क्रसबारबाट बाहिरिददा आर्सनल बराबरीबाट चुक्यो । ३५औं मिनेटमा रिस जेम्सले गोल गर्दै चेल्सीको अग्रता दोब्बर पारे । उनले मासन माउन्टको पासमा बायाँ कर्नरमा उत्कृष्ट गोल गर्न सफल हुदा गोलरक्षक बन्ड लेनोले रोक्ने कुनै अवसर नै पाएनन् ।

४१औं मिनेटमा रिस जेम्सले बुकायो साका फल गरेको भन्दै आर्सनलले पेनाल्टीको अपिल गरेपनि भिएआरले मान्यता दिएन । ५०औं मिनेटमा माटियो कोभासिसको पासमा लुकाकुको प्रहारलाई पाब्लो मारीले ब्लक गर्दा रिवाउन्डमा काई हाभर्टजको प्रयासलाई रोव होल्डिङले विफल पार्दा चेल्सीले थप अग्रता बढाउन सकेन ।

५२औं मिनेटमा बुकायो साकाको २५ यार्ड टाढाको प्रहार मार्काेस अलन्सोलाई डिफ्लेक्ट हुदै आएको प्रहारलाई गोलरक्षक इडुआर्ड मेन्डीले बचाउँदा आर्सनलले गोल अन्तर कम गर्न सकेन । ५९औं मिनेटमा रोव होल्डिङको हेडर पोस्ट नजिकैबाट बाहिरियो । ६८औं मिनेटमा मार्काेस अलन्सोको हाफ भली प्रहारले पोस्टको दिशा लिन सकेन ।

लगत्तै काउन्टर अट्याकमा पेपेको पासमा इमिल स्मिथ रोवीको प्रहारलाई चेल्सीका कप्तान सिसर एज्पिलिक्वेटाले ब्लक गरे । ७७औं मिनेटमा लुकाकुको प्रहारलाई आर्सनलका गोलरक्षक बन्ड लेनोले विफल पारे । ८७औं मिनेटमा लुकाकुको पासमा काई हाभर्टजको प्रहारलाई गोलरक्षक लेनोले विफल पारेपछि पहिलो हाफको दुई गोल नै चेल्सीको जितमा निणाएयक बन्यो ।

नयाँ सिजनका चेल्सीको यो लगातार दोस्रो जित हो । पहिलो राउन्डमा चेल्सीले क्रिस्टल प्यालेसलाई ३–० ले पराजित गरेको थियो । लगातार दोस्रो जितसँगै चेल्सी २ खेलबाट ६ अंक जोडेर शीर्षस्थानमा उक्लिएको छ । समान ६ अंक नै रहेपनि लिभरपुल, ब्राइटन र टोटेनहम हटस्पर गोल अन्तरमा पछि छ । लगातार दोस्रो हार बेहोरेको आर्सनल अंकविहीन हुदै पुछारमा छ ।