एजेन्सी – स्पेनिस ला लिगामा आज राति विभिन्न तीन खेलमा प्रतिस्पर्धा हुँदा साविकको उपविजेता रियल म्याड्रिड लेभान्टे भ्रमणमा निस्कँदैछ । खेल लेभान्टेको मैदानमा नेपाली समयअनुसार राति १:४५ बजे हुनेछ ।

घरेलु मैदानमा रियललाई स्तब्ध पार्दै लेभान्टे ला लिगाको नयाँ सिजनमा पहिलो जित निकाल्ने लक्ष्यमा हुनेछ । लेभान्टेले पहिलो खेलमा क्याडिजसँग १–१ गोलको बराबरी खेलेको थियो । टोलीसँग रोजर, जोस लुइस मोरालेस, जर्ग डि फ्रुटोस, कार्लाेस, गोन्जालो मेलेरो, जोश काम्पना, सन, ओस्कार डुआर्टे, रोवेर, कोकी र गनेलरक्षक एइटर रहेका छन् ।

यता, रियल पनि ला लिगामा लगातार दोस्रो जित दर्ता गर्नै लक्ष्यमा मैदानमा उत्रनेछ । रियलले पहिलो खेलमा एलाभेसलाई ४–१ ले पराजित गरेको थियो । टोलीसँग पहिलो खेलमै दुई गोल गरेका करिम बेन्जेमा, इडेन हाजार्ड, ग्यारेथे बेल, क्यासमिरो, फेडे भाल्र्भेडे, इस्को, डेभिड अलाबा, इडर मिलिसाओ, नाचो फर्नान्डेस, लुकास भास्क्वेज र गोलरक्षक थिवाउट कोर्टुवा रहेका छन् ।

यस्तै भिनिसियस जुनियर, रोड्रिगो र मार्काे एसेन्सियो पनि टोलीसँग रहेका छन् । चोटका कारण मिडफिल्डरद्धय लुका मोड्रिच र टोनी क्रुस टोलीमा हुनेछैनन् ।

यि दुई टोलीबीचको २२ खेलको नतिजामा रियल हावी छ । रियलले १४ खेल आफ्नो पक्षमा पार्दा लेभान्टे ५ खेलमा विजयी भएको छ । ३ खेल बराबरीमा सकिएको छ । पछिल्लो दुई भेटमा दुवै टोलीले समान एक–एक जित निकालेका छन् । तर पछिल्ला खेलमा लेभान्टेले रियललाई पराजित गरेको छ ।

अन्य खेल

रियल सोसिडाडविरुद्ध रायो भालेकानो (राति ८:४५ बजे)

एट्लेटिको म्याड्रिडविरुद्ध इल्चे (राति ११:१५ बजे)