एजेन्सी – रियल बेटिसका प्रशिक्षक म्यानुएल पेलेग्रिनीले आफैं प्रतिस्पर्धा गरिरहेको स्पेनिस ला लिगा निकै सुस्त रहेको भन्दै आलोचना गरेका छन् ।

शुक्रबार क्याडिजसँग १-१ को बराबरीमा रोकिएपछि उनले लिगको चावी सुधार्न आवश्यक रहेको बताएका हुन् । पेलेग्रिनीको टोलीले शुक्रबार अन्त्यतिर क्याडिजको निकै रक्षात्मक शैलीका कारण बराबरी गोल फर्काउन सकेको थिएन । रियल म्याड्रिड र म्यानचेस्टर सिटीका समेत प्रशिक्षक रहिसकेका पेलेग्रिनीले लिगको अस्मिता सुधार्न सबै टोलीले आ-आफ्नो तर्फबाट योगदान दिनुपर्ने बताए ।

खेलको गति नै रोक्ने कतिपय टोलीको रणनीतिले लिगलाई असर गर्ने उनको बुझाइ छ । ‘यस लिगका रेफ्री, प्रशिक्षक र खेलाडीले संयुक्त रुपमा आफ्नो छवी सुधार्नु पर्छ । रेफ्रीहरुले बताए अनुसार स्पेनिस लिग युरोपकै सुस्त लिगमा पर्छ । समर्थकहरु फुटबलको मजा लिन आएका छन् र हामी त्यो दिन सकिरहेका छैनौं,’ उनले भने ।

‘खेलमा समय खेर फाल्ने, डाइभ गरेर फल जित्ने जस्ता गतिविधिले राम्रो संदेश दिदैन । समर्थकहरु खेल हेर्न आएका हुन् । तर विपक्षीले फुटबल नखेल्ने रणनीति लिएपछि कसैको केहि लाग्दैन । क्याडिजले अन्तिम १५ मिनेट बल रोक्ने बाहेक कुनै रणनीति लिएन,’ उनले भने ।

पेलेग्रिनीको टोली बेटिसले लिगमा लगातार दोस्रो बराबरी खेलेको हो । अब टोलीले अर्को साता रियल म्याड्रिडको आतिथ्यता गर्नेछ । पछिल्लो ६ खेलमा बेटिसले रियलविरुद्ध २ जित र १ बराबरीको नतिजा निकालेको छ ।