एजेन्सी – बोरुसिया डर्टमुन्डले जर्मन बुन्डेसलिगा अन्तर्गत लिगको दोस्रो खेलमा हार बेहोरेको छ । डर्टमुन्डले घरेलु टोली फ्रेइवर्गसँग २–१ को हार बेहोरेको हो ।

डर्टमुन्डलाई हार चखाउन फ्रेइवर्गका भिन्सेन्जो ग्रिफो र रोलान्ड सल्लाईले गोल गरे । डर्टमुन्डले एकमात्र गोल आत्मघाती गोल पाएको थियो । फ्रइवर्गमा शनिबार भएको खेलको छैटौ मिनेटमा नै ग्रिफोले गोल गर्दै घरेलु टोलीलाई अग्रता दिलाएका थिए । उनले ३० यार्ड टाढाबाट गरेको फ्रिकिक सिधै गोल भएको थियो ।

एक गोलले पछि परेपछि डर्टमुन्डले बल पोसेसन राख्दै घरेलु टोलीलाई लगातार दवाव बढाएपनि दोस्रो हाफमा अर्काे गोल खान पुगेको थियो । ५३औं मिनेटमा रोलान्डले गोल गर्दै फ्रेइवर्गको अग्रता दोब्बर पारे । उनले लुकास होलेरको पासमा गोल गर्न सफल भएको थिए ।

५९औं मिनेटमा यान्निक केइटेलले आत्मघाती गोल गरेपछि डर्टमुन्ड खेलमा फर्कने संकेत देखिएको थियो । तर, त्यसपछि पनि डर्टमुन्डले फ्रेइवर्गको बलियो रक्षापङ्तिलाई तोड्न नसक्दा पराजित हुन पुग्यो ।

पहिलो जित दर्ता गरेको फ्रेइवर्गको दुई खेलबाट ४ अंक पुगेको छ । फ्रेइवर्ग पहिलो खेलमा अर्मेनिया बिलेफिल्डसँग गोलरहित बराबरीमा रोकिएको थियो । पराजित डर्टमुन्डको दुई खेलबाट ३ अंक छ ।

अन्य नतिजा

बोचुनविरुद्ध मेइन्ज (२–०)

फ्रान्कफर्टविरुद्ध अग्सवर्ग (०–०)

ग्रिथेर फुर्थविरुद्ध अर्मेनिया बिलेफिल्ड (१–१)

हर्था बर्लिनविरुद्ध वल्फ्सबर्ग (१–२)