एजेन्सी – इंग्लिस प्रिमियर लिग सिजन २०२१/२२ अन्तर्गत आज दोस्रो चरणको खेल सुरु हुँदैछ । शनिबार ६ खेल हुँदा उपाधि दावेदार लिभरपुल र म्यानचेस्टर सिटी मैदानमा उत्रनेछन् ।

दिनको पहिलो खेलमा लिभरपुलले घरेलु मैदान एनफिल्डमा बर्नलीको अतिथ्यता गर्दैछ । यो खेल नेपाली समयानुसार साँझ ५:१५ बजे हुनेछ । लिभरपुल पहिलो खेलमा नर्विचलाई ३-० ले पराजित गर्दै सुखद सुरुवात गर्न सफल भएको थियो । बर्नली भने घरेलु मैदानमा ब्राइटनसँग २-१ ले पराजित भएको थियो ।

लिभरपुलका लागि एन्ड्रयु रोबर्टसन र कर्टीस जोन्स चोटका कारण उपलब्ध छैनन् । मिडफिल्डर फाबिन्होले पनि आफ्नो पिताको देहान्तका कारण नखेल्ने सम्भावना छ । आक्रमणमा फेरिपनि रोबर्टो फिर्मिनो र डिओगो जोटामा कसले खेल्छ भन्ने प्रतिस्पर्धा छ । यता बर्नलीका डेल स्टेफेन्स र केभिन लङ चोटका कारण खेल्ने छैनन् ।

त्यसपछि अर्को खेलमा म्यानचेस्टर सिटी र नर्विचले प्रतिस्पर्धा गर्नेछन् । खेल रातको ७:४५ बजे हुनेछ । गत साता टोटेनहमको मैदानमा १-० ले पराजित भएको सिटी यस खेलमा जित हासिल गर्दै लय पकड्न चाहन्छ । पहिलो खेलमा लिभरपुलसँग पराजित भएको नर्विच पनि पहिलो अंक जोड्ने सुरमा नै हुनेछ ।

आज नै ७:४५ बजे अन्य तीन खेल हुनेछ । एस्टन भिल्लाले न्युकासल युनाइटेडसँग खेल्दा दुवै टोली पहिलो जितको खोजीमा हुनेछन् । क्रिस्टल प्यालेसविरुद्ध ब्रेन्टफर्ड लगातार जितको लक्ष्यसहित उत्रनेछ । लिड्स र एभर्टन पनि पहिलो अंक जोड्ने प्रयासमा हुनेछन् ।

दिनको अन्तिम खेलमा ब्राइटन र वाटफर्ड भिड्नेछन् । रातको १०:१५ बजे हुने खेलमा दुवै टोली लगातार जितको खोजीमा हुनेछन् ।