काठमाडौं (हाम्रो खेलकुद)– नेपाली महिला राष्ट्रिय फुटबल टोली फिफा वरियतामा एक स्थान तल झरेको छ । विश्व फुटबल महासंघ (फिफा) ले शुक्रबार जारी गरेको अगष्टको वरियतामा नेपाल एक सय एक स्थानमा रहेको छ । यसअघि जुनमा भएको वरियतामा नेपाल सयौं स्थानमा थियो ।

कोरोना महामारीका कारण महिला टोलीले पछिल्लो डेढ वर्षभन्दा लामो समयदेखि अन्तर्राष्ट्रिय फुटबल खेलेको छैन । पछिल्लो पटक स्वदेशमै आयोजना भएको १३ औं दक्षिण एसियाली खेलकुद (साग) मा नेपाली टोलीले रजत पदक जितेको थियो । पोखरामा भएको प्रतियोगिताको फाइनलमा नेपाली टोली भारतसँग पराजित भएको थियो ।

अहिले भने महिला टोली एसिया कप छनोटको तयारीमा जुटेको छ । अर्को महिना उज्वेकिस्तानमा हुने छनोटअन्तर्गत नेपालले असोज २ गते फिलिपिन्स तथा असोज ५ गते हङकङसँग प्रतिस्पर्धा गर्नेछ । समूहको विजेता अर्को वर्ष भारतमा आयोजना हुने एसिया कपका लागि छनोट हुनेछ ।

फिफा वरियतामा दक्षिण एसियाका अन्य देशमा भारत ५७ औं, बंगलादेश एक सय ३७ औं, श्रीलंका एक सय ४३ औं, माल्दिभ्स एक सय ४४ औं र भुटान एक सय ६१ औं स्थानमा छ । फिफा वरियताको शीर्षस्थानमा अमेरिका, दोस्रोमा स्विडेन, तेस्रोमा जर्मनी, चौथोमा नेदरल्यान्ड्स र पाँचौंमा फ्रान्स रहेको छ । केहि दिन अघि भएको पुरुषतर्फको वरियतामा ३ स्थान सुधार गर्दै नेपाली टोली एक सय ६८ औं स्थानमा पुगेको थियो ।