एजेन्सी – जर्मन सुपर कपको उपाधिका लागि आज राति बुन्डेसलिगा च्याम्पियन बायर्न म्युनिख र डिएफवी पोकल च्याम्पियन बोरुसिया डर्टमुन्ड भिड्दैछन् ।

खेल नेपाली समयअनुसार सिग्नल इडुना पार्क डर्टमुन्डमा १२ः१५ बजे हुनेछ । साविक विजेता समेत रहेको बायर्न म्युनिख घरेलु टोलीलाई हराउँदै सिजनको पहिलो उपाधि जित्ने लक्ष्यमा हुनेछ ।

बायर्नसँग रोबर्ट लेवान्डोस्की, थोमस मुलर, लिरोए साने, सर्ज गिनाब्री, लियोन गोरेट्ज्का, योसुवा किम्मिख, अलफन्सो डाभिस, निकलस सुल, बोउना सार, डेअट उपमिकानो र म्यानुयल नुएर टोलीमा रहेका छन् ।

यता, घरेलु मैदानमा हुने खेलमा डर्टमुन्ड साविक विजेता बायर्नलाई हराउँदै सिजनको पहिलो उपाधि जित्ने लक्ष्यमा मैदानमा उत्रनेछ । टोलीसँग युवा स्टार एर्लिङ ब्राउट हालान्ड, मार्काे रिउस, थोर्गन हाजार्ड, जियोभानी रेना, मामुद दाहुद, जुडे बेलिङघम, म्यानुयल एकान्जी, एक्सेल विस्टेल र रोमन बुर्की टोलीमा रहेका छन् ।

गत सिजन बायर्नले डर्टमुन्डमाथि ३–२ को जित निकाल्दै उपाधि जितेको थियो । जर्मन सुपर कप बुन्डेस लिगा च्याम्पियन र डिएफबी पोकल विजेताबीच प्रतिस्पर्धा हुने प्रावधान छ ।

डिएफवी सुपर कप र डिएफएल सुपर कपको नामले २१औं सिजन सकिदा बायर्न ८ पटक च्याम्पियन बन्न सफल भएको छ । डर्टमुन्डले ६ पटक उपाधि जितेको छ । वेडर ब्रेमेनले ३ पटक उपाधि जित्दा एफसी काइसरस्लाउटन, भिएफवी स्टुर्टगार्ट र भिएफएल वल्फ्सवर्ग समान एक पटक च्याम्पियन बनेको छ ।