एजेन्सी – इंग्लिस क्लब चेल्सीका फरवार्ड ट्याम्मी अब्राहम इटालियन क्लब रोमामा अनुबन्धित भएका छन् । रोमाले २३ वर्षीय इंग्लिस फरवार्ड ट्यामी अब्राहमलाई ५ वर्षको लागि ३४ मिलियन पाउन्डमा अनुबन्ध गरेको हो ।

रोमामा सम्झौता लगत्तै उनको रिलिज क्लज ६८ मिलियन पाउन्ड राखेको छ । ट्याम्मीको आइतबार नै मेडिकल भएपनि क्लबले मंगलबार मात्रै सार्वजनिक गरेको हो । ट्याम्मी रोमा पुगेसँगै प्रशिक्षक जोसे मौरिन्हो र ट्याम्मीको पुनर्मिलन हुने भएको छ । रोमाले यसै सिजन मौरिन्होलाई मुख्य प्रशिक्षकमा नियुक्त गरेको थियो ।

ट्याम्मीले रोमामा ९ नम्बरको जर्सी लगाउने छन् । चेल्सीले बेल्जियन फरवार्ड रोमेलु लुकाकुलाई ९८ मिलियन पाउन्डमा क्लबमा अनुबन्ध गरेपछि ट्याम्मीले पहिलो रोजाईमा खेल्ने सम्भावना न्युन बनेपछि उनले चेल्सी छाड्ने निर्णय गरेका हुन् । यता रोमाबाट खेल्दै आएका फरवार्ड एडिन जेको भने इन्टर पुगेका छन् ।

चेल्सीको एकेडेमीमा हुर्किएका अब्राहमले सन् २०१६ मा सिनियर टिममा डेब्यु गरेका थिए । त्यसपछि उनी लोनमा च्याम्पियनसिप क्लब ब्रिस्टोल सिटीमा पुगेका थिए । त्यसपछि दुई सिजन लोनमै स्वान्सी सिटी र एस्टन भिल्लामा खेलेपनि २०१९–२० मा चेल्सीमा फर्किएका थिए । उनले उक्त सिजन ४७ खेलमा १८ गोल गरेका थिए । गत सिजन विरलै अवसर पाएका ट्याम्मीले ३२ खेलमा १२ गोल गरेका थिए ।

ट्याम्मीले चेल्सीका लागि उनले ८२ खेलमा ३० गोल गरेका छन् । सन् २०१७ देखि इंग्ल्यान्डको टोलीमा रहेको ट्याम्मीले चेल्सीबाट च्याम्पियन्स लिग र यूईएफए सुपर कपको उपाधि जितेका छन् ।