एजेन्सी – नर्वेजियन युवा फरवार्ड एर्लिङ ब्राउट हालान्डले दुई गोल र दुई असिस्ट दिएपछि बोरुसिया डर्टमुन्डले जर्मन बुन्डेसलिगामा सानदार जित दर्ता गरेको छ ।

घरेलु मैदानमा शनिबार राति भएको खेलमा डर्टमुन्डले फ्रान्कफुर्टमाथि ५–२ को सानदार जितसहित विजयी सुरुवात गरेको हो । मार्काे रिउस, थोर्गन हाजार्ड र जियोभानी रेनाले समान एक गोल गरे । फ्रान्कफुर्टका जेन्स पिटरले गोल गर्दा एक गोल उपहार पाएको थियो ।

सिग्नल इडुना पार्कमा डर्टमुन्डले खेलको २३औं मिनेटमा कप्तान मार्काे रिउसको गोलबाट अग्रता लिएको थियो । उनले एर्लिङ ब्राउट हालान्डको पासमा गोल गरेका थिए । त्यसको दुई मिनेटपछि फेलिक्स पास्लाकले आत्मघाती गोल गरेपछि खेल १–१ गोलको बराबरीमा पुगेको थियो ।

३२औं मिनेटमा थोर्गन हाजार्डले हालान्डको पासमा गोल गरेपछि डर्टमुन्डले पुनः अग्रता लिन सफल भयो । सुरुवाती दुई गोलमा असिस्ट दिएका हालान्डले ३४औं मिनेटमा गोल गरेपछि डर्टमुन्डले पहिलो हाफमा ३–१ को अग्रता लिन सफल भएको थियो । ४०औं मिनेटमा मार्काे रिउसले गोल गरेपनि उनको गोलले भिएआरबाट मान्यता पाएन ।

५८औं मिनेटमा जियोभानी रेनाले गोल गर्दै डर्टमुन्डलाई ४–१ ले अघि बढाए । ७०औं मिनेटमा हालान्डले व्यक्तिगत दोस्रो तथा टोलीका लागि पाँचौ गोल गरेपछि डर्टमुन्ड फराकिलो जिततर्फ अग्रसर बन्यो । उनले कप्तान रिउसको पासमा गोल गरेका थिए । खेल सकिन ४ मिनेट बाँकी रहँदा जेन्स पिटरले गोल गरेपनि डर्टमुन्ड ५–२ ले विजयी हुन सफल भयो ।

अन्य नतिजा
अर्मेनिया बिलेफिल्डविरुद्ध फ्रेइवर्ग (०–०)
अग्सवर्गविरुद्ध होफेनहाइन (०–४)
युनियन बर्लिनविरुद्ध बायर लिभरकुसन (१–१)
भिएफबी स्टुटगार्टविरुद्ध ग्रिउथर फर्थ (५–१)
वल्फ्सवर्गविरुद्ध बोचुम (१–०)