एजेन्सी – युरोपेली सिजनको सुरुवातको रुपमा लिइने यूईएफए सुपर कपमा युरोपेली च्याम्पियन चेल्सी र युरोपा लिग विजेता भिल्लारियल प्रतिस्पर्धा गर्दैछन् । खेल नेपाली समयअनुसार बुधबार मध्यरात १२:४५ बजे सुरु हुनेछ ।

चेल्सीले च्याम्पियन्स लिगको फाइनलमा म्यानचेस्टर सिटीलाई पराजित गर्दै उपाधि जितेको थियो । त्यस्तै भिल्लारियलले भने इंग्लिस प्रिमियर लिगकै म्यानचेस्टर युनाइटेडलाई हराउँदै युरोपा लिगको उपाधि हासिल गरेको थियो । दुवै टोली युरोपमा आफ्नो उच्च लयलाई कायम राख्दै नयाँ सिजनमा सुखद सुरुवात गर्ने सुरमा हुनेछन् ।

चेल्सीले ट्रान्सफर बजारमा क्लबकै पूर्व फरवार्ड रोमेलु लुकाकुलाई अनुबन्ध गर्ने तयारी गरिरहेको छ । क्लबले सेभियाका डिफेन्डर जुलस कुन्डेलाई पनि नजरमा राखेको छ । चेल्सीले प्रि-सिजनमा २ जित र १ बराबरीको नतिजा निकालेको थियो । प्रिमियर लिगको सुरुवातमै बलिया टोलीको सामना गर्नुपर्ने भएकाले चेल्सीले आफ्नो बलियो टोली उतार्ने देखिन्छ ।

भिल्लारियलका लागि क्लबका मुख्य फरवार्ड जेरार्ड मोरेनोले ६ वर्षको लागि सम्झौता नविकरण गरेका छन् । यसबाहेक डिफेन्डर पाउ टोरेस युरो र ओलम्पिकमा राष्ट्रिय टोलीको जिम्मेवारी निर्वाह गरेर फर्केका छन् । प्रि सिजनमा ३ हार र ३ बराबरीको नतिजा निकालेको टोली महत्त्वपूर्ण यस खेलमा जितको लक्ष्यमा हुनेछ ।

चेल्सी र भिल्लारियल दुवै च्याम्पियन्स लिगको समूह चरणमा पनि छन् । केहि महिनाअघि क्लब इतिहासकै पहिलो उपाधि जितेको भिल्लारियल त्यसलाई दोब्बर पार्ने सुरमा हुनेछ । थोमस टुचेल भने चेल्सीसँग आफ्नो जादुमयी क्षणलाई थप विशेष बनाउन तल्लिन हुनेछन् ।