काठमाडौं (हाम्रो खेलकुद) – ‘ए’ डिभिजन क्लब सातदोबाटो युथ क्लबसँग स्टार अस्पताल लिमिटेड मेडिकल पार्टनरको रुपमा जोडिएको छ ।

सातदोबाटो युथ क्लब सातदोबाटो ललितपुर र स्टार अस्पताल लिमिटेड सानेपा ललितपुरबीच सोमबार एक वर्षको लागि सम्झौता भएको हो । सम्झौतामा स्टार अस्पतालका तर्फबाट अध्यक्ष किशोर महर्जन र क्लबको तर्फबाट अध्यक्ष कपिल रानामगरले हस्ताक्षर गर्दै आदान–प्रदान गरे ।

सम्झौता कार्यक्रममा अस्पतालका मेडिकल डाइरेक्टर डाक्टर साहिल रुपाखेती, डा. सन्जय भट्टचन र क्लबका महासचिव सुनिल विष्ट, सचिव रविन खड्का, व्यवस्थापक विनोद राई, सदस्य प्रकाश मानन्धर र पारस महर्जन लगायतको उपस्थिति रहेको थियो ।

सम्झौताअनुसार क्लबले अस्पतालबाट विभिन्न स्वास्थ सेवा पाउनेछ । क्लबले पनि अस्पतालको विविध माध्यमबाट प्रचार–प्रसार गर्नेछ ।पहिलोपटक ‘ए’ डिभिजन लिग खेल्ने तयारीमा रहेको सातदोबाटोले लिगलाई लक्षित गर्दै खेलाडी अनुबन्धमा आक्रमक रुपमा अघि बढेको छ ।

क्लबले लिगलाई लक्षित गर्दै पिटर सेगुन, मानबहादुर तामाङ, स्यान्सु भुसाल, आदिल हामिद, बसन्त तामाङ, अभिषेक बराल, आशिष राई, सुदिप गुरुङ, प्रकाश पुन, करण रावत र रन्जन पुन लगायतका खेलाडी अनुबन्ध गरिसकेको छ । यस्तै बसन्त ओझा, प्रशान्त अवस्थी, सनम राई र महेन्द्र कार्कीलाई क्लबमा अनुबन्ध गरिसकेको छ । ‘ए’ डिभिजन लिग २९ कात्तिकबाट हुने तयारी छ ।