एजेन्सी – प्रि–सिजनको मैत्रीपुर्ण खेलमा इटालियन क्लब इन्टर मिलानले जित हात पार्दा इंग्लिस क्लब लिभरपुल बराबरीमा रोकिएको छ । इन्टर मिलानले इटालियन प्रतिद्धन्द्धी पार्मामाथि २–० को सहज जित हात पारेको हो ।

मिलानको जितमा मार्सेलो ब्रोजोभिक र माटिएस भेसिनोले गोल गरे । दुवै गोल दोस्रो हाफमा सम्भव भएको थियो । पार्मामा आइतबार राति भएको खेलको ५९औं मिनेटमा मार्सेलो ब्रोजोभिकले गोल गर्दै इन्टरलाई अग्रता दिलाएका थिए । ६९औं मिनेटमा माटिएस भेसिनोले गोल गर्दै इन्टरको जित पक्का गरे ।

यस्तै अर्काे मैत्रीपुर्ण खेलमा इंग्लिस क्लब लिभरपुल र स्पेनिस क्लब एथलेटिको बिल्वाओले १–१ गोलको बराबरी खेलेका छन् । एनफिल्डमा आइतबार राति भएको खेलमा लिभरपुलका लागि डिएगो जोटाले गोल गर्दा बिल्वाओका एलेक्स बेरेनगुएरले बराबरी गोल फर्काए ।

खेलको १३औं मिनेटमा डिएगो जोटाको गोलबाट लिभरपुलले अग्रता लिएको थियो । ५३औं मिनेटमा एलेक्स बेरेनगुएरले बराबरी गोल फर्काए । त्यसपछि थप गोल निस्कन नसक्दा खेल बराबरीमा टुंगियो ।

यस्तै अर्काे खेलमा स्पेनिस क्लब एट्लेटिको म्याड्रिड डच क्लब फियोनुर्डसँग २–१ ले पराजित भएको छ । १८औं मिनेटमा ब्रायन लिन्सेनको गोलबाट फियोनुर्डले अग्रता लिएको थियो ।

४१औं मिनेटमा यान्निक कारास्को रातो कार्ड खाँदै मैदानबाट बाहिरिएपछि एट्लेटिको समस्यामा परेको थियो । तर, ८३औं मिनेटमा एन्ज कोरेआले गोल गर्दै खेललाई १–१ गोलको स्थितिमा ल्याउँदै एट्लेटिकोलाई खेलमा फर्काएका थिए । ९०औं मिनेटमा नोओफल बान्निसले गोल गर्दै एट्लेटिकोलाई स्तब्ध पारे ।