काठमाडौं (हाम्रो खेलकुद)– अखिल नेपाल फुटबल संघ (एन्फा) को आयोजनामा अर्को महिना आयोजना हुने सहिद स्मारक ‘सी’ डिभिजन लिग छनोटमा पहिलो पटक सुदूरपश्चिम प्रदेशको टोलीले पनि सहभागिता जनाउने भएको छ ।

बाजुराको रानीवन स्पोर्टस् क्लबले सी डिभिजन छनोटका लागि आइतबार एन्फामा दर्ता गरेको क्लबका सल्लाहकार नरेश रोकायाले जानकारी दिए । जिल्लाका खेलाडीहरुको खेलप्रतिको रुचीका कारण नै आर्थिक रुपमा कठिन भएपनि छनोटमा भाग लिन लागिएको रोकायाले बताएका छन् ।

‘काठमाडौंबाट त्यति टाढाको जिल्लाबाट छनोटमा सहभागी हुनु आर्थिक रुपमा निकै कठिन हुन्छ,’ उनले भने, ‘तर पनि फुटबल प्रति हाम्रा ठाँउका भाईहरुको रुचीका कारण हामीले सहभागिता जनाउने निर्णय गरेका हौं । कठिन छ तर पनि सुदूरपश्चिमबाट सबैको सहयोग रहने अपेक्षा गरेका छौं ।’

क्लबका अध्यक्ष ध्रुव रोकाया अहिले जिल्लामै टोलीको तयारीमा जुटिरहेका छन् । उनका अनुसार स्थानिय ८/९ खेलाडी अभ्यासमा छन् । ‘सुदूरपश्चिमको यो विकट ठाँउमा मैदानको अभाव छ । त्यसका बाबजुद पनि युवाहरुमा फुटबल प्रतिको आकर्षण छ भन्ने सन्देश दिनका लागि कठिन नै भएपछि छनोट खेल्ने तयारीमा छौं,’ अध्यक्ष रोकायाले भने,’ भविष्यमा एन्फाले बाजुरालाई पनि आफ्नो संगठन भित्र राखोस् भन्ने चाहना हाम्रो छ । त्यसका लागि हामीले आफ्नो ठाँउको फुटबललाई चिनाउने यो एउटा प्रयास हो ।’

छनोटका लागि टोलीको तयारीसँगै खेलाडी छनोट पनि भइरहेकोले इच्छुक खेलाडीलाई सम्पर्क गर्न पनि क्लबले आव्हान गरेको छ । यसैबीच, एन्फाले सी डिभिजन लिग छनोटको दर्ताका लागि साउन मसान्त सम्मको समय अवधि बढाएको छ । यसअघि साउन २५ गते सम्म दर्ताका लागि समय तोकेको थियो ।

रानीवन सुदूरपश्चिमबाट सी छनोट खेल्न दर्ता हुने पहिलो क्लब भएको लिग समितिका निर्देशक सञ्जिव मिश्रले जानकारी दिए । उनका अनुसार आइतबार सम्ममा ३२ टोलीको सहभागिताका लागि दर्ता गराएका छन् ।