काठमाडौं (हाम्रो खेलकुद) – नेपाली राष्ट्रिय फुटबल टोलीका युवा फरवार्ड मनिष डाँगीले ए डिभिजन लिगको च्याम्पियन मछिन्द्र क्लबबाट खेल्ने भएका छन् । मनिषले आइतबार मछिन्द्रसँग औपचारिक रुपमा सम्झौता गरेको क्लबले जनाएको छ ।

क्लबका तर्फबाट अध्यक्ष सुनिल कपाली र मनिषले सम्झौता पत्रमा हस्ताक्षर गरेका थिए । उनले ए डिभिजन लिग र राष्ट्रिय लिगका लागि सम्झौता गरेका हुन् । यसअघि खालीबारी एफसीबाट सी डिभिजनमा खेलेका मनिषले मोफसलमा भने थ्री स्टार क्लबबाट खेलेका थिए । थ्री स्टारले उनलाई राख्ने इच्छा देखाएपनि मछिन्द्रले मोटो रकम दिएपछि उनी त्यसतर्फ लागेका हुन् ।

मनिषले नेपाल सुपर लिगमा विराटनगर सिटी फुटबल क्लबबाट प्रभावशाली प्रदर्शन गरेपछि राष्ट्रिय टोलीमा स्थान बनाएका थिए । प्रशिक्षक अब्दुल्लाह अलमुताइरीले उनलाई इराकविरुद्ध मैत्रीपूर्ण खेलमा नै डेब्यु दिएका थिए । मनिषले डेब्युमा गोल गर्दै सनसनी मच्चाएका थिए । त्यसपछि विश्वकप छनोटमा पनि उनले राम्रो प्रदर्शन गरेका थिए । उनले उमेर समूहमा पनि खेल्दै आएका छन् ।

मनिषको आगमनसँगै मछिन्द्रले पनि लिगको तयारीलाई थप बलियो बनाएको छ । मछिन्द्रले अघिल्लो सिजनकै अधिकांश खेलाडीलाई क्लबमा राख्ने बुझिएको छ । केहि खेलाडीले भने क्लब छाड्नेछन् । क्लबले केहि दिन अघि मात्र फिजियो सुरज भुषालसँग पनि सम्झौता नविकरण गरेको थियो ।