एजेन्सी – क्यानडाले टोकियो ओलम्पिक २०२० अन्तरगतको महिला फुटबलतर्फको च्याम्पियन बनेको छ । उपाधि दावेदार स्वीडेनको चुनौती पेनाल्टी सुटआउटमा ३–२ ले पन्छाउँदै क्यानडाले स्वर्ण हात पारेको हो ।

निर्धारित समयमा १–१ गोलको बराबरी तथा त्यसपछि अतिरिक्त समयमा थप गोल निस्कन नसक्दा खेल पेनाल्टी सुटआउटमा लम्बिएको थियो । टाइब्रेकरमा दुवै टोलीका खेलाडीले कमजोर प्रदर्शन गरेपनि क्यानडाले सडन डेथमा बाजी मारेको हो । रोमाञ्चक बनेको पेनाल्टीमा स्वीडेनकी कोसोभारे एस्लाएनीको पहिलो पेनाल्टी नै क्रसबारमा लाग्दै बाहिरिएको थियो । क्यानडाकी जेस्सी फ्लेमिङले गोल गरिन् ।

स्वीडेनकी नाथालि बिजोर्नले गोल गर्दा क्यानडाकी लरेन्सको प्रहारलाई स्वीडेनकी गोलरक्षक लिन्डालले बचाइन् । त्यसपछि स्काउजले गोल गर्दै स्वीडेनलाई २–१ ले अघि बढाइन् । भेनेसा गिलेसको प्रहार क्रसबारमा लाग्दै बाहिरिदा स्वीडेन अघि बढेको थियो । त्यसपछि एन्भेगार्डको प्रहारलाई लावीले बचाउँदै क्यानडाको सम्भावना जीवितै राखिन् ।

त्यसपछि एड्रिएना लिओनको प्रहार पनि गोल हुन नसकेपछि खेल रोमाञ्चक बनेको थियो । सेगरको प्रहार बाहिरिदा स्वीडेन जितबाट वञ्चित बन्यो । क्यानडाकी डिएनी रोसले गोल गर्दै खेललाई २–२ गोलको बराबरीमा ल्याइन् । एन्डरसनको प्रहारलाई लावीले बचाउँदा क्यानडाको लागि छैटौ प्रहारमा आएकी जुलिया ग्रोस्सोले गोल गर्दै टोलीलाई ३–२ को रोमाञ्चक जितसहित स्वर्ण दिलाइन् ।

त्यसअघि जापान नेशनल स्टेडियममा शुक्रबार भएको खेलको ३४औं मिनेटमा स्टिना ब्ल्याकटेनिएसको गोलबाट स्वीडेनले अग्रता लिएको थियो । ६७औं मिनेटमा जेसी फ्लेमिङले पेनाल्टीमार्फत गोल गर्दै खेललाई १–१ गोलको बराबरीमा ल्याएकी थिइन् । त्यसपछि गोल निस्कन नसक्दा खेल अतिरिक्त समय हुँदै पेनाल्टीमा लम्बिएको थियो ।