काठमाडौं (हाम्रो खेलकुद) – अखिल नेपाल फुटबल संघ (एन्फा) ले शुक्रबार दिउँसो नेपाल र भारतको राष्ट्रिय टोलीले दशरथ रंगशालामा दुई मैत्रीपूर्ण खेल आयोजना गर्ने सूचना जारी गर्यो । भाद्र १७ र २० गतेका लागि खेलको मिति तय भएको पनि लेखिएको छ ।

भारतले नेपालमा आएर पहिलो पटक अन्तर्राष्ट्रिय मैत्रीपूर्ण खेल खेल्ने तय भएको हो । तर त्यसको केहि घण्टा नबित्दै भारतले आफ्नो तर्फबाट विज्ञप्ति जारी गर्दै नेपालसँग खेल पक्का भइ नसकेको र उक्त प्रक्रिया अन्तिम चरणमा रहेको जनाएको छ । मुख्य प्रशिक्षकले खेल पक्का गर्न बाँकी रहेको कारण देखाउँदै भारतले यस्तो जानकारी दिएको हो । भारतले आफ्नो वेबसाइटमा नेपालले खेलका लागि प्रस्ताव गरेको बताएपनि एन्फाका अनुसार भने भारत आफैंले नेपाललाई खेलका लागि चिठी लेखेको हो ।

अन्य देशसँग खेल्न कोरोना संक्रमणका कारण क्वारेन्टाइन नियम रहेको र नेपालमा भने आउन पाइने हुनाले सो प्रस्ताव राखिएको थियो । एन्फाले पनि भारतको प्रस्ताव स्वीकार गर्दै मैत्रीपूर्ण खेल पक्का भएको जनायो । तर भारतले भने आफूले एसिया सँगै अफ्रीकाका अन्य राष्ट्रसँग पनि मैत्रीपूर्ण खेलका लागि प्रस्ताव पठाएको जनाएको छ ।

हाल दक्षिण एसियामा विशेषगरी भारत, नेपाल र बंगलादेशमा कोरोना संक्रमण अझै नियन्त्रणमा नआएकाले पनि खेलका लागि यात्रा गर्न कठिनाइ छ । त्यसैले पनि भारत र नेपालबीच खेलका लागि सहमति भएको थियो । तर भारतले भने नेपालसँग खेल्ने पक्का गरेर पनि अन्य राष्ट्रले प्रस्ताव स्वीकार गर्ने आशाका साथ आफ्नो तर्फबाट प्रक्रिया अन्तिम चरणमा रहेको बताएको छ ।

आफैंले एन्फालाई खेलका लागि प्रस्ताव गरेपनि भारतले आफ्नो वेबसाइटमा भने नेपालले मैत्रीपूर्ण खेलको प्रस्ताव राखेको जनाएको छ । एन्फाले भने आफूसँग भारतले खेलको प्रस्तावसहित पठाएको चिठी सुरक्षित रहेको जानकारी दिएको छ ।