एजेन्सी – घरेलु टोली जापानलाई हराउँदै मेक्सिकोले टोकियो ओलम्पिक अन्तरगतको पुरुष फुटबल (यु–२३) मा कास्यपदक जित्न सफल भएको छ ।

साइतामा स्टेडियममा शुक्रबार भएको खेलमा जापानलाई ३–१ ले पराजित गर्दै तेस्रो स्थान हासिल गर्न सफल भएको हो । मेक्सिकोको जितमा फ्रान्सिस्को कोर्डाेभा, जोहान भास्क्वेज र एर्नेस्टो भेगाले गोल गरे । जापानका काओरु मितोमाले एक गोल फर्काए । पहिलो हाफमा दुई तथा दोस्रो हाफमा एक गोल सम्भव भएको थियो ।

खेलको १३औं मिनेटमा फ्रान्सिस्को कोर्डाेभाले पेनाल्टीमार्फत गोल गर्दै मेक्सिकोलाई १–० को अग्रता दिलाए । २२औं मिनेटमा जोहान भास्क्वेजले गोल गर्दै मेक्सिकोलाई पहिलो हाफमा २–० ले अघि बढाए । उनले फ्रान्सिस्को कोर्डाेभाको पासमा गोल गरेका थिए ।

५८औं मिनेटमा एर्नेस्टो भेगाले गोल गर्दै मेक्सिकोलाई सहज जिततर्फ अघि बढाए । ७८औं मिनेटमा काओरु मितोमाले गोल गर्दै खेललाई ३–१ को अवस्थामा ल्याए । उनले ताकेफुसा कुवोको पासमा गोल गरेका थिए । त्यसपछि थप गोल निस्कन नसक्दा मेक्सिको विजयी हुदै कास्य जित्न सफल भयो ।

जापानले बल पोसेसन राखेपनि फिनिसिङमा चुक्दा पराजित हन पुग्यो । यससँगै मेक्सिकोले समूह चरणमा भोगेको हारको बदला लिएको छ । मेक्सिकोले समूह चरणमा २–१ को हार बेहोरेको थियो ।

ओलम्पिक फुटबलको पुरुषतर्फको स्वर्णको लागि शनिबार साँझ ५ः१५ बजे ब्राजिलको यु–२३ टोली र स्पेनको यु–२३ टोलीबीच प्रतिस्पर्धा हुदैछ । लगातार तेस्रोपटक फाइनलमा पुगेको ब्राजिल लगातार दोस्रो उपाधिको खोजीमा हुनेछ । स्पेन १९९२ पछि उपाधि जित्ने लक्ष्यमा हुनेछ ।