एजेन्सी – इंग्लिस विंगर ज्याक ग्रिलिस कीर्तिमानी मुल्यमा म्यानचेस्टर सिटीमा अनुबन्धित भएका छन् । ग्रिलिस १ सय मिलियन पाउन्डमा एस्टन भिल्लाबाट म्यानचेस्टर सिटीमा आएका हुन् ।

बेलायती खेलाडीको लागि खर्चिएको यो सबैभन्दा बढी रकम हो । सिटीले ग्रिलिसलाई ६ वर्षको लागि क्लबमा अनुबन्ध गरेको हो । अब उनी २०२७ सम्म इतिहाद स्टेडियममा रहनेछन् । २५ वर्षीय ग्रेयलिसले सिटीमा खाली रहेको १० नम्बर जर्सी लगाउनेछन् । क्लबका अर्जेन्टिनी भेट्रान फरवार्ड सर्जियो अगुएरो सिजनको अन्त्यसँगै क्याटलान क्लब बार्सिलोना पुगेका थिए ।

ग्रिलिसले वेम्बली स्टेडियममा शनिबार हुने कम्युनिटी शिल्डमा लेस्टर सिटीविरुद्धको खेलबाट सिटीबाट डेब्यु गर्ने सम्भावना छ । सिटीमा अनुबन्ध भएसँगै ग्रिलिसले आफ्नो करिअरमा नयाँ अध्यायको सुरुवात भएको बताएका छन् ।

‘सिटी इंग्ल्यान्डको उत्कृष्ट टोली हो । यहाँका प्रशिक्षक पनि विश्वस्तरीय छन् । क्लबको हिस्सा हुन पाउँदा खुसी लागेको छ,’ ग्रिलिसले भने, ‘पछिल्लो १० सिजनमा सिटीले महत्वपुर्ण उपाधि जितिसकेको छ । ग्वार्डिओलाको प्रशिक्षणमा सिटीको फुटबल माथिल्लो स्तरमा छ । पेपको लागि खेल्नु र उहाँबाट सिक्नु मेरो लागि विशेष सौभाग्य हो । यो केही शीर्ष फुटबलरको चाहना हो । उनी अद्भुत छन् ।’

सिटीले गत सिजन रुबेन डियासलाई ६२ मिलियन पाउन्डमा पोर्चुगिज क्लब बेन्फिकाबाट अनुबन्ध गरेको थियो । सन् २०१६ मा इंग्लिस क्लब म्यानचेस्टर युनाइटेडले फ्रान्सेली मिडफिल्डर पउल पोग्वालाई ८९ मिलियन पाउन्ड खर्चिएको थियो । जुन बेलायती क्लबले खर्चेको सबैभन्दा बढी मुल्य थियो ।

ग्रिलिस ६ वर्षको उमेरदेखि एस्टन भिल्लामा आबद्ध भएका थिए । गत सेप्टेम्बरमा ग्रिलिसले भिल्लासँग सन् २०२५ सम्मको सम्झौता नविकरण गरेका थिए । तर राम्रो प्रस्ताव आएपछि भिल्लाले ग्रिलिसलाई बेच्न तयार भएको हो । ग्रिलिसले सन् २०१३ मा भिल्लाको सिनियर टोलीबाट खेलेका थिए । एक खेलपछि उनी लोनमा लिग वान क्लब नट्स काउन्टीमा पुगेका थिए ।

ग्रिलिसले भिल्लाबाट ७ सिजन खेल्दा २ सय १३ खेलमा ३२ गोल गरेका छन् । रिपब्लिक अफ आयरल्यान्डबाट उमेर समूहमा खेलेका ग्रिलिसले २०१६ मा इंग्ल्यान्डबाट खेल्ने निर्णय गरेका थिए । इंग्ल्यान्डको यु–२१ बाट खेलेका ग्रिलिसले २०२० देखि राष्ट्रिय टोलीमा स्थान बनाउँदा १२ क्याप जितेका छन् । उनी युरो २०२० को टोलीमा पनि थिए ।