एजेन्सी – अर्जेन्टिनी सुपरस्टार लिओनेल मेस्सीले बार्सिलोना छाड्ने पक्का भएसँगै उनको भविष्यबारे टिका टिप्पणी हुन थालेको छ । दुवै पक्ष सम्झौताको लागि सहमत भएपनि ला लिगाको नियम अनुसार उक्त सम्झौता लागु हुन नसक्ने भएपछि मेस्सी क्लब छाड्न बाध्य भएका थिए ।

क्याटलान क्लबमा १७ वर्ष बिताएका मेस्सीका लागि अबको गन्तव्य कता भन्ने प्रष्ट भइसकेको छैन । उनको माग अनुसार सम्झौता गर्न सक्ने केहि सिमित क्लब मात्र रहेका छन् । मेस्सी ती क्लबसँग सहमतिमा आउन सक्ने वा नसक्ने भन्ने केहि समयमा थाहा हुने नै छ । वर्तमान अवस्थामा मेस्सीको गन्तव्य बन्न सक्ने क्लब यस्ता छन् :

पेरिस सेन्ट जर्मेन (पिएसजी)

पिएसजीले गत सिजन मेस्सीको सम्झौता सकिने बितिक्कै उनलाई सम्पर्क गरेको थियो । तर त्यसबेला बार्सिलोनामै रहने मनसाय बनाएका मेस्सीले कोपा अमेरिकामा ध्यान दिने भन्दै कुनै छलफल अघि बढाएनन् । च्याम्पियन्स लिग जित्ने महत्त्वकांक्षा बोकेको पिएसजीले मेस्सीलाई भित्र्याउन सक्दो प्रयास गर्नेछ ।

मेस्सी पिएसजी गएको अवस्थामा नेयमार र एम्बापपेसँग उनको बलियो साझेदारी बन्नेछ । नेयमार र मेस्सीबीच मैदानबाहिर पनि राम्रो सम्बन्ध रहेको छ । बार्सिलोनामा सँगै खेलेका यी खेलाडी केहि दिन अघि पिएसजीकै केहि खेलाडीसँग छुट्टीमा देखिएका थिए । पिएसजीको आवश्यकता र आर्थिक अवस्थाले पनि मेस्सीको लागि फ्रान्स राम्रो गन्तव्य बन्न सक्छ ।

म्यानचेस्टर सिटी

पेप गुआर्डीओला म्यानचेस्टर सिटीको प्रशिक्षक रहँदा मेस्सीले आफ्नो करिअरको सर्वाधिक सफल समय व्यतित गरेका थिए । गुआर्डीओला आफैंले पनि सार्वजनिक रुपमा नै मेस्सीको प्रशंसा गर्दै आएका छन् । सिटी आर्थिक अवस्थामा निकै बलियो छ र मेस्सीलाई प्रिमियर लिगमा भित्र्याउन हैसियत राख्दछ ।

विहीबार मात्र ज्याक ग्रिलिसलाई एस्टन भिल्लाबाट १ सय मिलियन पाउण्डमा अनुबन्ध गरेको सिटीको नजर इंग्ल्यान्डका कप्तान ह्यारी केनमा छ । केनलाई भित्र्याउन टोटेनहमले १ सय ५० मिलियन पाउण्ड माग गरिरहेको छ । मेस्सी उपलब्ध भएको अवस्थामा सिटीले केनलाई छोडेर अर्जेन्टिनी फरवार्डतर्फ ध्यान दिने देखिन्छ ।

मेजर लिग सकर

मेस्सीले आफ्नो करिअरको कुनै समयमा अमेरिकी लिग खेल्ने आँकलन गरिएको छ । इन्टर मायमीका सह-मालिक जोर्गे मासले मेस्सीले एकदिन लिग खेल्नेमा आफू सकारात्मक रहेको बताएका थिए । तर उनले अहिले नै एमएलएस खेल्ने सम्भावना भने कम छ ।

व्यक्तिगत रुपमा राम्रो लयमा रहेका उनी केहि सिजन युरोपमा नै बिताउन चाहन्छन् । च्याम्पियन्स लिग जित्ने लक्ष्य राखेका उनले अमेरिकी क्लबमा भने केहि वर्षपछि जानेछन् । अहिलेको अवस्थामा आर्थिक हिसाबले पनि क्लबहरु उनलाई अनुबन्ध गर्न सक्ने देखिदैन ।

नेवेल्स ओल्ड ब्वाइज

मेस्सीले आफ्नो करिअरको अन्त्यमा बाल्यकालको क्लब नेवेल्स ओल्ड ब्वाइज जाने बताएका थिए । तर अहिले नै अर्जेन्टिना फर्कने सम्भावना भने देखिदैन । जुनमा मेस्सीको सम्झौता समाप्त भएपछि क्लबले उनको अवस्थाबारे चासो भने राखेको थियो । सन् २००१ मा नेवेल्सबाट बार्सिलोना आएका मेस्सी यस क्लबमा फर्कन अझै केहि वर्ष कुर्नुपर्ने देखिन्छ ।

बार्सिलोनामै बस्ने सम्भावना जीवित

मेस्सी र बार्सिलोनाले विज्ञप्तिमा जनाए अनुसार ला लिगाको कारण सम्झौता हुन नसकेको हो । दुवै पक्षबीच सहमति बनेको छ तर लिगको नियमले त्यसलाई मान्यता दिदैन । ला लिगाले पनि मेस्सीलाई अन्यत्र गएको हेर्न चाहँदैन । यसैपनि लिगको चर्चा केहि कमजोर भइरहेको अवस्थामा मेस्सीको प्रस्थानले लिगकै प्रायोजनमा असर गर्नेछ ।

ला लिगामा पछिल्लो पटक अमेरिकी कम्पनिले ल्याएको लगानीको विषयमा पनि क्लबहरुले सहमति जनाएका छैनन् । यसकारण पनि लिगले अब केहि पछि हट्नुपर्ने अवस्था हुन सक्छ । रियल र बार्सिलोना दुवैले लिगलाई दोष देखाउँदै विज्ञप्ति जारी गरेका छन् । यसले लिगको आर्थिक पाटोमा झन् असर गर्ने देखिन्छ ।