एजेन्सी – अष्ट्रेलियालाई हराउँदै अमेरिकाले टोकियो ओलम्पिक २०२० अन्तरगतको महिला फुटबलमा कास्यपदक हात पारेको छ ।गोलको वर्षा भएको खेलमा अमेरिकाले अष्ट्रेलियालाई ४–३ ले हराउँदै कास्यपदक जित्न सफल भएको हो ।

अमेरिकाको जितमा मेगान रापिनोइ र कार्ली लोएडले समान दुई गोल गरिन् । अष्ट्रेलियाका लागि सामान्थ खेर, काइटलिन फोर्ड र इमिली जिलनिकले समान एक गोल गरेपनि हार टार्न सकिनन् । कासिमा सकर स्टेडियममा बिहीबार भएको खेलको आठौं मिनेटमा मेगान रापिनोइले गोल गर्दै अमेरिकालाई १–० को अग्रता दिलाइन् ।

१७औं मिनेटमा सामान्थ खेरले गोल गर्दै खेललाई १–१ गोलको बराबरीमा ल्याइन् । २१औं मिनेटमा मेगानले व्यक्तिगत र टोलीको लागि दोस्रो गोल गर्दै अमेरिकालाई २–१ ले अगाडि बढाइन् । ४५औं मिनेटमा कार्ली लोएडले गोल गरेपछि अमेरिकाले पहिलो हाफमा ३–१ को अग्रता लिन सफल भएको थियो ।

५१औं मिनेटमा कार्लीले व्यत्तिगत दोस्रो तथा टोलीका लागि चौथो गोल गरेपछि अमेरिकाले ४–१ को आरामदायी अग्रता लिन सफल भएको थियो । त्यसपछि अष्ट्रेलियाले दुई गोल गर्दै खेलमा फर्कने प्रयास गरेपनि जितको लागि पर्याप्त भएन । ५४औं मिनेटमा काइटलिन फोर्डले तथा ९०औं मिनेटमा इमिलीले गोल गरेकी थिइन् ।

स्वर्णका लागि बिहीबार स्वीडेन र क्यानडाबीच प्रतिस्पर्धा हुदैछ । स्वीडेनले अष्ट्रेलियालाई तथा क्यानडाले अमेरिकालाई समान १–० ले हराउँदै फाइनलमा स्थन बनाउन सफल भएको थियो ।