काठमाडौं (हाम्रो खेलकुद)– राष्ट्रिय फुटबल टोलीका पूर्व फिजियोथेरापिष्ट सुरज भुसाल सहिद स्मारक ए डिभिजन लिगका लागि फेरि पनि मछिन्द्र क्लबमा आबद्ध भएका छन् । दुई वर्षअघि मछिन्द्रले पहिलो पटक लिग जित्दा पनि भुसाल टोलीको फिजियोथेरापिष्ट थिए ।

अर्थोप्लाष्ट रिह्याब सेन्टरका आर्थोपेडिक एण्ड स्पोर्टस फिजियोथेराष्टि मेडिकल डाइरेक्टर समेत रहेका भुसालले मच्छिन्द्रसँग बिहीबार सम्झौता पत्रमा हस्ताक्षर गरेका छन् । यसपटक कात्तिक २९ बाट ए डिभिजन लिग सुरु हुने अखिल नेपाल फुटबल संघ (एन्फा) ले यसअघि नै जनाइसकेको छ ।

भुसालले ए डिभिजन लिग अवधिभर टोलीका खेलाडीको मैदान बाहिर र भित्र सबै खाले फिजियोथेरापी र प्रारम्भिक स्वास्थ्य सेवाको जिम्मेवारी निर्वाह गर्नेछन् । गत वैशाखमा सम्पन्न नेपाल सुपर लिगमा उनी ललितपुर सिटी एफसीमा आबद्ध थिए । भुसालले सन् २०१३ देखि २०१७ सम्म राष्ट्रिय टोलीमा रहेर काम गरेका थिए । उनी नेपालले एएफसी सोलिडारीटि कप जित्दा टोलीका सदस्य थिए ।

पछिल्लो केहि वर्ष यता नेपालका घरेलु क्लबहरूले पनि खेलाडीको स्वास्थ्य अवस्था र फिटनेसलाई मध्यनजर गर्दै फिजियो राख्न थालेका छन् । यसअघि शीर्ष फुटबल क्लबले मात्र फिजियो राख्ने गरेका थिए । तर खेलाडीको प्रदर्शनमा प्रत्यक्ष प्रभाव देखिन थालेपछि लगभग सबै ए डिभिजन टोलीले फिजियो राखेका छन् ।

क्रिकेटमा पनि फ्रेन्चाइज लिगमा हरेक टोलीले फिजियो राखेका थिए । भलिबलमा होंगान्जी न्यू डायमन्डले अर्थोप्लास्टसँग सहकार्य गर्दै टोलीमा फिजियो राखेको छ ।