काठमाडौं (हाम्रो खेलकुद) – गोलरहित बराबरी खेल्दै नेपालले एएफसी सोलिडारिटी कपको यात्रा सुरु गरेको छ । मलेसियाको कुचिङ जारी प्रतियोगितामा शनिबार साँझ भएको खेलमा नेपालले टिमोर लेस्टेसँग गोलरहित बराबरी खेलेको हो ।

खेलमा राम्रो पकड जमाउन सफल नेपालको प्रहार दुइ पटक पोस्टमा ठोक्कियो । पहिले नवयुगको बक्स बाहिरबाटको सानदार प्रहार पोस्टमा लाग्दा नेपालले ४७ मिनेटमा अग्रता लिन सकेन । त्यस्तै ७१ मिनेटमा अनन्त तामङको हेडर क्रसबारमा लाग्दा नेपालले अर्को मौका चुकायो । नेपालले खेलमा कैयौ मौकाहरु सिर्जना गरेपनी फितलो प्रहार गर्दै थुप्रै मौकाहरु गुमाउदै अंक बाड्न बाध्य भयो ।

अब नेपालले समूहको अन्तिम खेल ब्रुनाईसँग मंगलबार खेल्नेछ । पहिलो खेलमा टिमोर लेस्टेलाई ४–० ले हराएको ब्रुनाई शनिबारको नतिजासँग सेमिफाइनल पुगेको छ ।

अब नेपाल र टिमोर लेस्टेमध्ये एउटा टोली सेमिफाइनल पुग्नेछ । त्यसका लागि मंगलबार हुने नेपाल र बु्रनाईको नतिजासम्म कुर्नुपर्ने हुन्छ । त्यो खेलमा नेपाल पराजित भएमा गोलअन्तरका आधारमा अघिल्लो चरण पुग्ने टोलीको टुंगो लाग्नेछ ।

दोस्रो हाफमा नेपालले केही मौका पाउनका वावजुद गोल गर्न सकेन । ६८ औं मिनेटमा अन्जन विष्टलेको क्रसमा अनन्त तामाङ हेड क्रस बारमा ठोक्कियो । त्यस्तै ८१ औं मिनेटमा भरत खवासको प्रहार पोस्टको अलिक टाढाबाट बाहिरिएको थियो ।
पाँच बर्षअघि विश्वकप छनोटमा टिमोर लेस्टेविरुद्ध २–१ र ५–० को नतिजा निकालेको नेपाल यसपटक भने कमजोर देखिएको थियो ।