काठमाडौं (हाम्रो खेलकुद) – ललितपुरको रुस्लान थ्री स्टार क्लबले उर्जन श्रेष्ठलाई मुख्य प्रशिक्षकमा नियुक्त गरेको छ । क्लबले मंगलबार उनलाई मुख्य प्रशिक्षकको रुपमा सार्वजनिक गरेको हो ।

मुख्य प्रशिक्षक मेघराज केसीले क्लब छाडेपछि थ्री स्टारले गत चैतमा श्रेष्ठलाई प्रशिक्षकमा नियुक्त गरेको थियो । श्रेष्ठले गत संस्करणको लिगमा ब्रिगेड ब्वाइज क्लब (बीबीसी) को प्रशिक्षण सम्हालेका थिए ।

अब उनले आसन्न ‘ए’ डिभिजन लिग र राष्ट्रिय लिगका लागि थ्री स्टारको प्रशिक्षण सम्हाल्नेछन् । उनले यसअघि मोफसलको दुई गोल्डकपमा थ्री स्टारको प्रशिक्षण सम्हालेका थिए । उनी थ्री स्टारका पुर्व खेलाडीसमेत हुन् ।

उनकै प्रशिक्षणमा थ्री स्टारले गत अप्रिलमा मकवानपुरमा आयोजना भएको चौथो संस्करणको बागमती गोल्डकपको च्याम्पियन बनेको थियो । उनी गोल्डकपको सर्वाेत्कृष्ट प्रशिक्षक समेत चुनिएका थिए ।

‘थ्री स्टारमा खेलाडीको रुपमा मैले दुईपटक सहिद स्मारक ‘ए’ डिभिजन लिग जितेको छु । म थ्री स्टारको एक प्रशिक्षकको रुपमा मेरो लागि तेस्रो लिगको उपाधि जित्न चहान्छु ।’ थ्री स्टारमा आबद्ध भएपछि प्रशिक्षक उर्जनले भने, ‘टिम राम्रो बनेको छ । अनुभवी र युवा खेलाडीको साथ छ । मलाई मेरो खेलाडीप्रति पुर्ण विश्वास छ । हामी लिगका लागि दावेदार छौं । फरक भुमिकामा तेस्रोपटक लिग च्याम्पियन बन्ने चाहना छ ।’

थ्री स्टारले नयाँ सिजनको लिगका लागि मिडफिल्डर आयुष घलान र डोना थापालाई अनुबन्ध गरिसकेको छ । थ्री स्टार क्लबका पुराना खेलाडीको सम्झौता नविकरण गर्ने र केही नयाँ खेलाडी अनुबन्धको दौडमा रहेको छ ।