काठमाडौं – मिडफिल्डर प्रकाश बुढाथोकी ललितपुरको फ्रेन्ड्स क्लबमा अनुबन्धित भएका छन् । फ्रेन्ड्सले प्रकाश बुढाथोकीलाइ न्युरोड टिम (एनआरटी) बाट लिग अवधिभरको लागि सोमबार सम्झौता गरेको हो ।

दवै पक्षले सम्झौता रकम खुलाएका छैनन् । यस सिजनको ए डिभिजन लिगमा उनले नै टोलीको कप्तानी सम्हाल्ने क्लबले जनाएको छ । यसअघिका कप्तान सरोज योन्जन लामाले क्लब छाडेपछि फ्रेन्ड्स कप्तानविहीन बनेको थियो । उनलाई क्लबमा क्लबका नव निर्वाचित अध्यक्ष दीपक थापा, पुर्व अध्यक्ष रत्न शम्शेर राणा र अन्य पदाधिकारीहरुले स्वागत गरे ।

सरोज मनाङमा आबद्ध भएका छन् । प्रकाश लामो समयपछि फ्रेन्ड्समा फर्किएका हुन् । गत वर्ष एनआरटीका लागि लिग खेलेका प्रकाश त्यसअघि मनाङ मर्स्याङ्दी क्लबमा आबद्ध थिए । प्रकाश अघिल्लो सिजन लिग च्याम्पियन मनाङमा अनुबन्ध भएपनि पहिलो खेलमै चोट लागेपछि उनले बाँकी सिजन बेन्चमा बिताउनु परेको थियो ।

चोटमुक्त भएपनि उनले मनाङबाट मोफसलका विभिन्न गोल्डकप खेले । मनाङ जानुअघि प्रकाशले एक सिजन भुटानी लिगमा बिताएका थिए । त्यसअघि उनले रुस्लान थ्री स्टार क्लबमा केहि वर्ष बिताएका थिए ।

‘ए’ डिभिजन लिग २९ कार्तिकबाट हुने तालिका छ । आइतबार मात्रै अखिल नेपाल फुटबल संघ (एन्फा), लिग कमिटि र १४ क्लबका प्रतिनिधिबीचको बैठकले लिगको नयाँ मिति तय गरेको हो । यसअघि लिग ३ असोजबाट हुने तालिका थियो ।