काठमाडौं (हाम्रो खेलकुद) – पहिलोपटक शीर्ष डिभिजन खेल्ने तयारीमा रहेको ललितपुरको सातदोबाटो युथ क्लब खेलाडी अनुबन्धनमा आक्रामक देखिएको छ ।

सातदोबाटोले आइतबार मात्रै ‘बी’ डिभिजन च्याम्पियन बनाउँदाका कप्तान वसन्त तामाङको सम्झौता नविकरण गर्दा गोलरक्षक अभिषेक बराल, आशिष राई, सुदिप गुरुङ र प्रकाश पुनलाई क्लबमा अनुबन्ध गरेको जानकारी गराएको छ । उनीहरुलाई सहिद स्मारक ‘ए’ डिभिजन लिग अवधिभरको लागि सम्झौता गरिएको बुझिएको छ ।

अखिल नेपाल फुटबल संघ (एन्फा), लिग कमिटि र ‘ए’ डिभिजनका १४ क्लबको प्रतिनिधिबीचको आइतबारको छलफलले लिग १५ नोभेम्वर अर्थात २९ कार्तिकबाट गर्ने निर्णय गरेको छ । यसअघि ३ असोजबाट लिग गर्ने एन्फाको तयारी थियो । सातदोबाटोले गोलरक्षक अभिषेक बराललाई ललितपुरकै च्यासल युथ क्लबबाट अनुबन्ध गरेको हो । उनी त्यसअघि थ्री स्टार क्लबको तेस्रो रोजाईका गोलरक्षक रहेका थिए ।

आशिष राईले मोफसलमा थ्री स्टारबाट खेलेका थिए । त्यसअघि उनले ‘बी’ डिभिजनमा श्री कुमारी क्लबबाट खेलेका थिए । मिडफिल्डर सुदिप गुरुङले यसअघि तल्लो श्रेणीमा टुसाल युथ क्लबबाट खेलेका थिए । मिडफिल्डर प्रकाश पुन यसअघि विभागीय नेपाल एपिएफ क्लबमा रहेका थिए ।

यसअघि सातदोबाटोले विदेशी खेलाडीको रुपमा नेपाल फुटबलका परिचित डिफेन्डर पिटर सेगुन, राष्ट्रिय टोलीका पुर्व सदस्य तथा हिमालयन शेर्पा क्लबका कप्तान मान बहादुर तामाङ र युवा खेलाडी स्यान्सु भुसाललाई क्लबमा अनुबन्ध गरिसकेको छ ।

यस्तै आदिल हामिद, करण रावत र रन्जन पुनलाई पनि टोलीमा अनुबन्ध गरिसकेको छ । लिगमा उच्च प्रदर्शन गर्ने अपेक्षासहित क्लबले मेघराज केसीलाई मुख्य प्रशिक्षकमा नियुक्त गरिसकेको छ । टोलीलाई थप बलियो बनाउन केही नाम चलेका स्टार खेलाडीलाई अनुबन्ध गर्ने प्रयास गरिरहेको क्लबले जनाएको छ ।

क्लब स्थापनाको २८ वर्ष पुग्दा ‘बी’ डिभिजनमा ११ वर्ष बढी बिताएपछि सातदोबाटो गत फागुनमा ‘बी’ डिभिजन च्याम्पियन हुँदै शीर्ष डिभिजनमा उक्लन सफल भएको थियो । ‘बी’ डिभिजन लिगमा मात्र एक खेल गुमाएको थियो । सातदोबाटोले ११ खेल मध्य ९ मा जित, १ मा बराबरी र १ खेल गुमाएको थियो ।