एजेन्सी – उपाधि दावेदार ब्राजिल र मेक्सिको टोकियो ओलम्पिक अन्तरगतको पुरुष फुटबलतर्फ सेमिफाइनलमा प्रवेश गरेका छन् । ब्राजिलले इजिप्टमाथि १–० को झिनो जित निकाल्दै अन्तिम चारमा स्थान पक्का गरेको हो ।

ब्राजिलको जितमा म्याथिएस कुन्हाले पहिलो हाफमा गरेको गोल नै निर्णायक बन्यो । उनले खेलको ३७औं मिनेटमा रिचार्लीसनको पासा गोल गरेका थिए । साइतामा स्टेडियममा शनिबार भएको खेलमा बल पोसेसनमा बलियो पकड बनाएपनि ब्राजिलले थप गोल भने गर्न सकेन ।

अब ब्राजिलले सेमिफाइनलमा मेक्सिकोसँग खेल्नेछ । मेक्सिकोले दक्षिण कोरियामाथि ६–३ को जित निकाल्दै अन्तिमा चारमा स्थान पक्का गरेको छ । शनिबार भएको क्वाटरफाइनलमा मेक्सिकोको जितमा हेनरी मार्टिन र फ्रान्सिस्को कोर्डाेभाले समान २ तथा लुइस रोमो र इडुआर्डाे एगुइरेले समान एक गोल गरे ।

कोरियाका दोङ कियोङ लिले दुई तथा उइ जो ह्वाङले एक गोल फर्काए । मेक्सिकोले पहिलो हाफमा ३–१ को अग्रता लिदा दोस्रो हाफमा थप ३ गोल गर्दा २ गोल खाएको थियो ।

सेमिफाइनल ३ अगस्टमा हुनेछ । अर्काे सेमिफाइनलमा सोही दिन जापान र स्पेनबीच प्रतिस्पर्धा हुनेछ । जापानले न्युजिल्यान्डलाई पेनाल्टी सुटआउटमा ४–२ ले तथा स्पेनले आइभोरी कोस्टलाई अतिरिक्त समयमा ५–२ ले पराजित गर्दै सेमिफाइनलमा स्थान बनाएको छ ।