सुबास हुमागाईं, काठमाडौं

‘आफ्टर एभ्री स्टर्म दिएर इज अ रेन्बो’ अर्थात हरेक आँधीबेहरीपछि इन्द्रेणी आउँछ । इन्द्रेणी अर्थात आशा, केहि कठिन समयपछि केहि राम्रो हुन्छ भन्ने संकेत । निकै कठिन परिस्थितिमा जुझिरहेको अखिल नेपाल फुटबल संघ (एन्फा) परिसरमा शुक्रबार इन्द्रेणी त देखियो, तर त्यसको सांकेतिक नतिजा एन्फाभित्र चलेको बैठकमा भने देखिएन ।

एन्फाभित्र शुक्रबार प्रशिक्षक अब्दुल्लाह अलमुताइरी र वरिष्ठ उपाध्यक्ष पंकज विक्रम नेम्बाङको विवाद समाधानका लागि आपतकालीन बैठक चलिरहँदा बाहिर इन्द्रेणी देखियो । तर बैठकभित्र भने सायदै कुनै आशालाग्दो निर्णय निस्कन सकेन । फेसबुकमा प्रशिक्षक अलमुताइरीले लगाएको आरोपबारे वरिष्ठ उपाध्यक्ष नेम्बाङले छानबिनको मागसहित निवेदन दिएका थिए । बिहीबार प्रशिक्षकले पनि वरिष्ठ उपाध्यक्ष र दुई संचारकर्मीमाथि छानबिन हुनुपर्ने मागसहित निवेदन दर्ता गराए ।

एन्फाले डाकेको आपतकालीन बैठकमा संघका मनोनित सदस्यलाई समेत स्थान दिइएन । तर बैठकमा स्वयं प्रशिक्षकलाई भने बोलाइयो । तर नेम्बाङका अनुसार प्रशिक्षकले बैठकमा निकै खराब व्यवहार गरे । उनले आफ्नो निवेदन पढेर भनाइ राखेपछि वरिष्ठ उपाध्यक्ष र संचारकर्मीको निवेदन वाचन नसकिंदै बैठक छाडेर निस्किए । सायद यो सबै संचारकर्मीबाट लुकाउन होला, एन्फा परिसरबाट नै संचारकर्मीलाई बाहिर निकालिएको थियो ।

सुरुवातमा त बैठकबारे समाचार संकलनका लागि उपस्थित सबै संचारकर्मीलाई बैठक कक्षमा स्थान दिइयो । पूर्वजानकारी अनुसार सुरुवाती १० मिनेट बैठक कक्षमा रहेपछि सबै संचारकर्मी नियमअनुसार बाहिरिए । बैठकको निर्णयको प्रतीक्षामा बाहिर बसेका सबै संचारकर्मीलाई त्यसपछि एन्फा परिसरबाट नै बाहिर निकाल्न भनियो । एन्फाको आग्रहअनुसार बाहिर गएका संचारकर्मीलाई पछि निर्णय लिन भित्र पस्न खोज्दा भने पुन: छिर्न दिइएन । पटक पटक प्रयास गर्दा एकले अर्कालाई औंला देखाउने कार्य भयो तर एन्फाको गेटमा राखिएका बाउन्सरले समाचार संकलनका लागि प्रवेश दिएनन् ।

वर्षा हुन थालेपछि भने एन्फाको पार्किङ क्षेत्रसम्म संचारकर्मीलाई स्थान दिइयो । यसबीचमा प्रशिक्षक अलमुताइरी दुई पटक एन्फा भवनबाट निस्किएर एकेडेमी तर्फ गए । केहि समयपछि उनी एन्फाबाट नै बाहिरीए । त्यसको केहि समयपछि नेम्बाङसँगै उपाध्यक्षद्वय कृष्ण थापा र वीरबहादुर खड्का तथा सदस्य दावा लामापनि बैठक छाडेर बाहिरीए ।

बैठकमा प्रशिक्षकको प्रस्तुति र अध्यक्ष कर्माछिरिङ शेर्पाको पटक पटक फेरिएको निर्णयलाई लिएर नेम्बाङ पक्ष असन्तुष्ट थियो । नेम्बाङले व्यक्तिगत रुपमा आफूले घटना बिर्सने भएपनि संस्थागत रुपमा सहि निर्णय गर्नुपर्ने अडान राखे । उपाध्यक्ष खड्काले पनि नेपाली फुटबलको हितमा निर्णय गर्न आग्रह गर्दै बैठक छाडेको बताए ।

यता अध्यक्ष शेर्पाले भने नेपाली फुटबल विकासकै लागि यो निर्णय लिइएको बताए । अब छानबिनको जिम्मेवारी युवा तथा खेलकुद मन्त्रालयको हातमा पुगेको छ । हालसम्म मन्त्री नै नपाएको मन्त्रालयको सचिव हाल जापानमा जारी टोकियो ओलम्पिकमा छन् । नेपाल ओलम्पिक कमिटीको अट्याची बनेर ओलम्पिक पुगेका उनले खेलकुद कति बुझेका छन् भन्ने उनले दिएका केहि अभिव्यक्तिले प्रष्ट हुन्छ । नेपालले ओलम्पिक पदक जित्नुपर्ने बताउने उनी खेलकुद मन्त्रालयमा आएको केहि महिना मात्र भएको छ ।

एन्फा प्रवक्ता किरण राईले कार्यसमिति बैठकको निर्णय सुनाउने क्रममा साफ च्याम्पियनसिप, राष्ट्रिय टोलीको तयारी र छानविनको विषयमा अभिव्यक्ति दिए । यसपछि उनले बैठक दौरान भएको संचारकर्मीमाथिको व्यवहारबारे आफूलाई थाहा नभएको र त्यसको लागि माफी पनि मागे । उनले आफूलाई मिडिया विभागबाट सहि सूचना नआएको र यस्तो व्यवहार भएकाले आउने दिनमा यस्तो घटना नदोहोरिने पनि जानकारी दिए । केहि समययता पटक पटक एन्फाको मिडियामै समस्या आइरहेको अवस्थामा प्रवक्ता राइले यसो भन्दा उनले जिम्मेवारी वहन गरेको प्रष्ट हुन्थ्यो । उनले गल्ती सच्याउने प्रण गरेपछि विषय टुंगियो ।

यस्तै विवाद टुंगिने निर्णय गर्न एन्फा भने संस्थागत रुपमा चुकेको छ । मन्त्रालयलाई छानबिन गराउने निर्णय गरेर विवाद थप लम्ब्याउने पक्का छ । साफ च्याम्पियनसिपको तयारीमा रहेको अवस्थामा प्रशिक्षक उपस्थित नहुँदा टोलीको तयारीमा प्रत्यक्ष असर त परेको छ नै । यसले समग्र टोलीकै मनोबलमा असर गर्छ । जति ढिला निर्णय, त्यति धेरै असमझदारी बढ्ने देखिन्छ । नेपाली फुटबलको विकासका लागि यो समयमा दुवै पक्षले व्यक्तिगत विषय अलग राखेर बस्नु नै उचित हुने हो । तर एन्फाको निर्णयले त्यस्तो संकेत गरेन ।

एन्फाको आजको निर्णयले विवादलाई अझै पर धकेलेको छ । यसैपनि फिफा र एएफसीको विधानमा यस्ता विवाद समाधानका लागि फिफा/एएफसीले मान्यता दिएको अथवा स्वतन्त्र समितिले छानबिन गर्नुपर्ने लेखिएको छ । सरकारलाई यस विषयमा घिसार्नुले अर्को समस्या पैदा नगर्ला भन्न सकिन्न । एन्फामा बैठक चल्दाको इन्द्रेणीले वातावरणको शोभा बढायो । एन्फाभित्रकै कर्मचारी र बैठकबाहिर रहेका मनोनित पदाधिकारीले छतबाट तस्बिर पनि लिए । तर त्यसअनुरुप एन्फाभित्र भने बैठकको निर्णयले भने अर्को मोड लियो । छानबिनले एक पक्षमा निर्णय त दिन्छ, तर यसबीचमा फुटबलले भने निराशाबाहेक सायदै केहि पाउला ।