एजेन्सी – स्वीडेन र अमेरिकाले टोकियो ओलम्पिक २०२० अन्तरगतको महिला फुटबलमा सेमिफाइनलमा यात्रा तय गर्दा समूह चरणमा गोलको वर्षा नै गरेको नेदरल्यान्ड्स क्वाटरफाइनलबाटै बाहिरिएको छ ।

स्वीडेनले घरेलु टोली जापानलाई ३–१ ले पराजित गर्दै अन्तिम चारमा स्थान पक्का गरेको हो । साइतामा स्टेडियममा शुक्रबार भएको खेलमा स्वीडेनको जितमा माग्डालेना एरिक्सन, स्टिना ब्ल्याकटेनिएस र कोसोभारे एस्लानीले गोल गरिन् ।

घरेलु टोलीका लागि मिना तानकाले सान्त्वना गोल फर्काए । पहिलो हाफ १–१ गोलको बराबरीमा सकिदा स्वीडेनले दोस्रो हाफमा दुई गोल थप्दै जित पक्का गरेको थियो ।

यस्तै क्वाटरफाइनलको अर्काे खेलमा अमेरिकाले उपाधिको बलियो दावेदार नेदरल्यान्ड्सलाई पेनाल्टी सुटआउटमा ४–२ ले स्तब्ध पार्दै अन्तिम चारमा स्थान पक्का गरेको छ । निर्धारित समयमा २–२ गोलको बराबरी र त्यसपछि अतिरिक्त समयमा थप गोल निस्कन नसक्दा खेल पेनाल्टी सुटआउटमा पुगेको थियो ।

निसान स्टेडियममा शुक्रबार भएको खेलको १८औं मिनेटमा जारी ओलम्पिकको सर्वाधिक गोलकर्ताको सुचीमा शीर्षस्थानमा रहेकी भिभिएन मिडेमाले गोल गर्दै नेदरल्यान्ड्सलाई १–० को अग्रता दिलाइन् । २८औं मिनेटमा सामन्था मेविसले बराबरी गोल फर्काइन् ।

३१औं मिनेटमा लेन विलियम्सले गोल गर्दै अमेरिकालाई २–१ ले अघि बढाइन् । ५४औं मिनेटमा भिभिएनले व्यक्तिगत दोस्रो गोल गर्दै खेललाई २–२ गोलको बराबरीमा ल्याइन् । त्यसपछि थप गोल निस्कन नसक्दा खेल अतिरिक्त समय हुदै पेनाल्टी सुटआउटमा लम्विएको थियो ।

अर्काे खेलमा अष्ट्रेलियाले इंग्ल्यान्डलाई अतिरिक्त समयमा ४–३ ले पराजित गर्दै सेमिफाइनलमा स्थन पक्का गरेको छ । अष्ट्रेलियाको जितमा सामान्थ खेरले दुई तथा एलान्ना केनेडी र मारी फोलेरले समान एक गोल गरिन् । इंग्ल्यान्डका लागि एलेन ह्वाइटले ह्याट्रिक पुरा गरेपनि जितको लागि पर्याप्त भएन ।

त्यसअघि ब्राजिललाई पेनाल्टी सुटआउटमा ४–३ ले हराउँदै क्यानडाले अन्तिम चारमा स्थान पक्का गरेको छ । अब सेमिफाइनलमा अमेरिका र क्यानडा तथा अष्ट्रेलिया र स्वीडेनबीच २ अगस्टमा खेल हुनेछ ।