काठमाडौं (हाम्रो खेलकुद) – ‘ए’ डिभिजन लिगको सर्वाधिक सफल टोली मनाङ–मर्स्याङ्दी क्लबका विंगर सुशील लामा आसन्न ‘ए’ डिभिजन लिगका लागि ललितपुरको फ्रेन्ड्स क्लबमा अनुबन्धित भएका छन् ।

करिव २ वर्षको मनाङ बसाईपछि उनले फ्रेन्ड्स क्लब रोजेका हुन् । सुशील र क्लबबीच मंगलबार सम्झौतापत्रमा हस्ताक्षर भएको छ । सम्झौता लिग अवधिभरको लागि रहनेछ । सम्झौता रकम गोप्य राखिएपनि उनलाई आकर्षक मुल्यमा अनुबन्ध गरिएको क्लबले जनाएको छ ।

अन्य क्लबहरुबाट सम्झौताको लागि प्रस्ताव आएपनि उनले आफुले खेलेको पुरानो क्लब नै रोजेको सुशीलले बताए । ‘२/३ क्लबबाट प्रस्ताव आएको थियो । तर, पहिले नै खेलिसकेको फ्रेन्ड्सबाट राम्रो प्रस्ताव आएपछि फ्रेन्ड्स नै रोजे,’ सुशीलले भने ।

२८ वर्षीय सुशीले वि.स. २०७० मा फ्रेन्ड्सबाट ‘ए’ डिभिजन लिग खेलेका थिए । त्यसअघि उनले न्युरोड टिम (एनआरटी) बाट २०६९ मै लिगको अनुभव बटुलिसकेका थिए । एनआरटीबाट लिग खेल्दा उच्च प्रदर्शन गरेपछि सहारा एकेडेकी पोखराका दोस्रो ब्याचका उत्पादन सुशीलले राष्ट्रिय टोलीको बन्द प्रशिक्षणमा पर्न सफल भएका थिए ।

२०६७–६८ मा ब्वाइज युनियनबाट ‘बी’ डिभिजन खेलेको सुशील त्यसपछि एनआरटी पुगेका थिए । २०७० मा एनआरटीले लिग नखेल्ने भएपछि उनी फ्रेन्ड्स क्लबमा पुगेका थिए । त्यसपछि झन्डै ४ वर्ष लिग नहुदा र लिग नखेलेका कारण रेलिगेसनमा परेको एनआरटीबाटै उनले ‘बी’ खेलेका थिए ।

एनआरटीलाई शीर्ष डिभिजनमा उकालेपछि केही समय मनाङबाट मोफसलका प्रतियोगिता खेलेपछि लिगका लागि एनआरटी नै फर्किएका थिए । अर्काे वर्ष उनी घरेलु फुटबलकै चर्चित मनाङमा स्थायी रुपमा अनुबन्ध भएका थिए । मनाङमा अनुबन्ध भएपनि उनले पहिलो रोजाईमा भने खासै अवसर पाएनन् ।